వాషింగ్టన్: పత్రికా సమావేశానికి ముందే అధ్యక్షుడు డొనాల్డ్ ట్రంప్ ఒక భారీ ప్రకటన చేశారు. ఇరాన్ యుద్ధం నుండి అమెరికా చాలా వేగంగా వెనక్కి తగ్గుతుందని ట్రంప్ ‘రాయిటర్స్’ వార్తా సంస్థతో పేర్కొన్నారు.
అవసరమైతే యుద్ధానికి తిరిగి వస్తామని కూడా ట్రంప్ స్పష్టం చేశారు. అదే సమయంలో నాటో (NATO) కూటమి నుండి అమెరికాని బయటకు తీసుకువస్తానని ట్రంప్ ప్రకటించి సంచలనం సృష్టించారు. హోర్ముజ్ జలసంధి నియంత్రణను చేపట్టేందుకు నాటో జోక్యం చేసుకోవాలని ట్రంప్ గతంలో కోరారు.
అయితే, నాటో తన సైన్యాన్ని పంపడానికి నిరాకరించింది. రేపు ఉదయం 6:30 గంటలకు మీడియాతో మాట్లాడటానికి ముందే ట్రంప్ రాయిటర్స్‌కు ఈ ఇంటర్వ్యూ ఇచ్చారు. ఇరాన్ ప్రభుత్వం ఇప్పటికే కాల్పుల విరమణ (Ceasefire) కోరిందని కూడా ట్రంప్ ఈ సందర్భంగా వెల్లడించారు.
నాటో (నార్త్ అట్లాంటిక్ ట్రీటీ ఆర్గనైజేషన్) కేవలం ఒక ‘కాగితపు పులి’ (Paper Tiger) అని, ఆ కూటమి నుండి అమెరికా నిష్క్రమించే విషయంపై తాను తీవ్రంగా ఆలోచిస్తున్నానని ట్రంప్ అన్నారు. ఇరాన్‌పై అమెరికా, ఇజ్రాయెల్ జరిపిన సైనిక చర్యకు మిత్రదేశాల నుండి మద్దతు లభించకపోవడమే దీనికి కారణమని ఆయన పేర్కొన్నారు. ‘టెలిగ్రాఫ్’కు ఇచ్చిన ఇంటర్వ్యూలో కూడా నాటో నుండి అమెరికాను ఉపసంహరించుకోవడంపై తన నిబద్ధతను చాటుకున్నారు.
హోర్ముజ్ జలసంధిని ఇరాన్ మూసివేసిన తర్వాత, ఆ జలమార్గంలో భద్రతను నిర్ధారించడానికి సైన్యాన్ని మోహరించాలన్న అమెరికా అభ్యర్థనను నాటో మిత్రదేశాలు తిరస్కరించాయి. ఇది ట్రంప్‌కు తీవ్ర ఆగ్రహం కలిగించింది. ఇరాన్‌పై సైనిక చర్యను ఈ కూటమి సమర్థించలేదు. యుద్ధం తర్వాత నాటోలో అమెరికా సభ్యత్వంపై మళ్లీ ఆలోచిస్తారా? అని ఒక విలేకరి అడిగిన ప్రశ్నకు.. “నేను ఎప్పుడూ నాటో ప్రభావానికి లోనుకాలేదు. అదొక కాగితపు పులి అని నాకు ఎప్పుడూ తెలుసు, రష్యా అధ్యక్షుడు పుతిన్‌కు కూడా ఆ విషయం తెలుసు” అని ట్రంప్ బదులిచ్చారు. నాటో విశ్వసనీయతపై తనకు ఎప్పటి నుంచో అనుమానాలు ఉన్నాయని ఆయన స్పష్టం చేశారు.