నిప్పులు చెరిగే ఎండ, నిర్మానుష్యమైన పర్వత శ్రేణులు.. అఫ్గానిస్థాన్‌లోని కందహార్ ప్రాంతంలో ఒక బృందానికి చెందిన అమెరికా సైనికులు తమ జీవితంలోనే అత్యంత భయంకరమైన క్షణాలను ఎదుర్కొన్నారు.
తీవ్రవాదుల వేటలో ఉన్న స్పెషల్ ఫోర్స్ యూనిట్, ఒక గుహలోని చీకటి నుండి బయటకు వచ్చిన ఆ రూపాన్ని చూసి ఒక్కక్షణం స్తంభించిపోయింది. పదమూడు అడుగుల ఎత్తు, మండుతున్న ఎరుపు రంగు జుట్టు, చేతులకు ఆరేసి వేళ్లు! పురాణాల్లోని అసుర రూపాలను గుర్తుకు తెచ్చే ఆ ‘కందహార్ రాక్షసుడి’ (Kandahar Giant) కథ ఇప్పుడు ప్రపంచవ్యాప్తంగా మళ్లీ చర్చనీయాంశమవుతోంది.
అసలేం జరిగింది? 2002లో కందహార్‌లోని మారుమూల పర్వతాల్లో అమెరికా స్పెషల్ ఫోర్స్ 13 అడుగుల ఎత్తు ఉన్న ఒక భారీ మనిషిని కాల్చి చంపిందనే వార్త హర్రర్ సినిమాను తలపిస్తోంది. అఫ్గాన్ ఆక్రమణలో భాగంగా జరిగిన ‘ఆపరేషన్ ఎండ్యూరింగ్ ఫ్రీడమ్’ సమయంలో, పట్రోలింగ్‌కు వెళ్లిన కొంతమంది అమెరికా సైనికులు అకస్మాత్తుగా అదృశ్యమయ్యారు. వారితో రేడియో సంబంధాలు తెగిపోవడంతో, స్పెషల్ ఆప్స్ యూనిట్ గాలింపు చేపట్టి ఒక పెద్ద గుహ వద్దకు చేరుకుంది. అక్కడ సైనిక సామాగ్రి చెల్లాచెదురుగా పడి ఉంది కానీ సైనికులు మాత్రం లేరు. ఆ సమయంలోనే గుహ లోపలి నుండి ఆ భయంకర రూపం బయటకు వచ్చింది.
సాక్ష్యాలు మరియు ప్రత్యక్ష సాక్షులు 2016లో ‘మిస్టర్ కె’ అని పిలవబడే ఒక మిలిటరీ కాంట్రాక్టర్ వెల్లడించిన వివరాల ప్రకారం.. గుహ నుండి బయటకు వచ్చిన ఆ రాక్షసుడికి రెండు వరుసల పళ్లు ఉన్నాయి. ఆ జీవి తన వద్ద ఉన్న ఒక ఈటెతో ఒక అమెరికా సైనికుడిని పొడిచి చంపింది. వెంటనే మిగిలిన సైనికులు తమ వద్ద ఉన్న అత్యాధునిక M4 కార్బైన్లు మరియు బారెట్ రైఫిల్స్‌తో సుమారు 30 సెకన్ల పాటు ఏకధాటిగా కాల్పులు జరిపారు. ఆ తర్వాతే ఆ రాక్షసుడు కుప్పకూలాడు.
కుళ్ళిపోయిన శవం నుండి వచ్చే దుర్వాసన ఆ రాక్షసుడి శరీరం నుండి వస్తుందని సైనికులు గుర్తు చేసుకున్నారు. చనిపోయిన ఆ జీవిని ఒక ‘చినూక్’ హెలికాప్టర్‌లో తరలించారు. ఈ విషయం బయటకు చెప్పకూడదని సైనికుల చేత రహస్య పత్రాలపై సంతకాలు చేయించుకున్నారని సమాచారం. అయితే ‘నిజం ప్రపంచానికి తెలియాలి’ అనే ఉద్దేశంతో కొందరు సైనికులు ఈ విషయాన్ని బయటపెట్టారు.
భారతీయ పురాణాల్లో మరియు ఇతర సంస్కృతుల్లో చెప్పబడిన ‘అసుర’ రూపాలకు ఇది దగ్గరగా ఉండటంతో సోషల్ మీడియాలో దీనిపై చర్చలు జరుగుతున్నాయి. అమెరికా రక్షణ శాఖ (Pentagon) దీనిని అధికారికంగా ధృవీకరించనప్పటికీ, అఫ్గాన్ కొండల్లోని ఈ రహస్యం ఇప్పటికీ ఒక మిస్టరీగానే మిగిలిపోయింది.