న్యూఢిల్లీ: ఒక దేశం యొక్క ఆర్థిక బలం కేవలం కరెన్సీ నోట్ల మీద మాత్రమే కాదు, ఆ దేశం బీరువాల్లో దాచుకున్న ‘బంగారు’ నిల్వలపై ఆధారపడి ఉంటుంది. స్టాక్ మార్కెట్లు కూలినా, యుద్ధాలు వచ్చినా దేశ ఆర్థిక వ్యవస్థను నిలబెట్టేది ఈ పసిడి నిధే. ప్రపంచంలోనే అత్యధిక బంగారు నిల్వలు కలిగిన టాప్-7 దేశాల జాబితాను పరిశీలిస్తే, భారత్ సాధిస్తున్న పురోగతి ప్రపంచ దేశాలను ఆశ్చర్యానికి గురి చేస్తోంది.
గోల్డ్ నిల్వల్లో టాప్-7 దేశాలు ఇవే:
- అమెరికా (USA): ప్రపంచంలోనే అత్యధికంగా 8,133 టన్నుల బంగారంతో అమెరికా మొదటి స్థానంలో ఉంది. డాలర్‌కు గ్లోబల్ డిమాండ్ ఉండటానికి ఈ భారీ నిల్వలే ప్రధాన కారణం.
- జర్మనీ: రెండో ప్రపంచ యుద్ధం తర్వాత చితికిపోయిన ఆర్థిక వ్యవస్థను 3,350 టన్నుల బంగారంతో జర్మనీ నిలబెట్టుకుంది. ఐరోపా సమాఖ్యలో ఈ దేశానిదే పైచేయి.
- ఇటలీ: 2,452 టన్నుల నిల్వలతో ఇటలీ మూడవ స్థానంలో ఉంది. దశాబ్దాలుగా తన నిల్వలను విక్రయించకుండా జాగ్రత్తగా కాపాడుకుంటోంది.
- ఫ్రాన్స్: డాలర్‌పై ఆధారపడటం తగ్గించుకునే వ్యూహంతో ఫ్రాన్స్ 2,437 టన్నుల పసిడిని పోగేసింది.
- రష్యా: అంతర్జాతీయ ఆంక్షలు ఉన్నప్పటికీ, తన గనుల నుండి నేరుగా బంగారాన్ని సేకరిస్తూ 2,300 టన్నులకు పైగా నిల్వలను రష్యా సిద్ధం చేసుకుంది.
- చైనా: అధికారికంగా 2,299 టన్నులు అని చెబుతున్నా, చైనా వద్ద అంతకంటే ఎక్కువే ఉండవచ్చని నిపుణుల అంచనా.
- భారత్: మన రిజర్వ్ బ్యాంక్ ఆఫ్ ఇండియా (RBI) వద్ద ప్రస్తుతం 880 టన్నుల బంగారం ఉంది. గతేడాది కాలంగా ఆర్బీఐ ప్రపంచ మార్కెట్ల నుండి భారీగా బంగారాన్ని కొనుగోలు చేస్తూ తన నిల్వలను పెంచుకుంటోంది.