తమిళనాడులోని చెంగల్పట్టు జిల్లా వండలూరు సమీపంలోని ప్రభుత్వ పాఠశాలలో 10వ తరగతి చదువుతున్న బాలికపై లైంగిక వేధింపులకు పాల్పడ్డారనే ఆరోపణలు కలకలం రేపుతున్నాయి.
కందిగై ప్రాంతంలోని ఈ పాఠశాలలో బాలబాలికలు కలిసి చదువుతున్నారు. గురువారం పాఠశాలలో ఉన్న సమయంలో ఓ 10వ తరగతి విద్యార్థిని మరుగుదొడ్డికి వెళ్లినట్లు సమాచారం. కొద్దిసేపటి తర్వాత ఆమె అక్కడ స్పృహ కోల్పోయిన స్థితిలో కనిపించడంతో తోటి విద్యార్థులు, పాఠశాల సిబ్బంది గుర్తించి ఆసుపత్రికి తరలించారు.
బాలిక తల్లిదండ్రులు ఇచ్చిన ఫిర్యాదు ప్రకారం.. గుర్తుతెలియని వ్యక్తులు పాఠశాల ప్రాంగణంలోకి ప్రవేశించి బాలికపై లైంగిక వేధింపులకు పాల్పడ్డారని ఆరోపించారు. ఈ ఘటనపై పోలీసులు కేసు నమోదు చేసి దర్యాప్తు చేపట్టారు. పాఠశాల చుట్టుపక్కల ఉన్న సీసీటీవీ ఫుటేజీలను పరిశీలించడంతో పాటు, బాలికకు వైద్య పరీక్షలు నిర్వహించినట్లు పోలీసులు తెలిపారు.
పాఠశాల భద్రతపై తల్లిదండ్రుల ఆందోళన
పాఠశాల వెనుక భాగంలో సరైన భద్రతా ఏర్పాట్లు లేవని, చుట్టూ పొదలు ఉండటంతో బయటి వ్యక్తులు లోపలికి ప్రవేశించే అవకాశం ఉందని తల్లిదండ్రులు ఆరోపిస్తున్నారు. పాఠశాలకు భద్రతను పెంచాలని, విద్యార్థినుల కోసం మరింత సురక్షితమైన వాతావరణం కల్పించాలని వారు డిమాండ్ చేస్తున్నారు.
ఈ ఘటనపై ఆగ్రహం వ్యక్తం చేసిన తల్లిదండ్రులు, బంధువులు పాఠశాల ఎదుట ఆందోళనకు దిగారు. అనంతరం వండలూరు–కేళంబాక్కం ప్రధాన రహదారిపై కూడా నిరసన చేపట్టడంతో కొంతసేపు ఉద్రిక్త పరిస్థితి నెలకొంది.
పోలీసుల వివరణ ఏమిటంటే?
అయితే ఈ ఘటనపై తాంబరం నగర పోలీసులు కీలక ప్రకటన చేశారు. ఫిర్యాదు అందిన వెంటనే కేసు నమోదు చేసి దర్యాప్తు ప్రారంభించామని తెలిపారు. సీసీటీవీ దృశ్యాలు, వైద్య పరీక్షల నివేదికలు, సాక్షుల వాంగ్మూలాలు సహా అందుబాటులో ఉన్న ఆధారాలను పరిశీలించినట్లు చెప్పారు.
ఇప్పటివరకు బాలికపై ఫిర్యాదులో పేర్కొన్న విధంగా లైంగిక వేధింపులు జరిగినట్లు నిర్ధారించే ఆధారాలు తమకు లభించలేదని పోలీసులు తెలిపారు. అయితే దర్యాప్తు ఇంకా కొనసాగుతోందని స్పష్టం చేశారు. బాలిక ప్రయోజనాలను దృష్టిలో ఉంచుకుని ధృవీకరించని సమాచారాన్ని ప్రచారం చేయవద్దని పోలీసులు కోరారు.
మరోవైపు, పోలీసుల వివరణను బాలిక కుటుంబ సభ్యులు, బంధువులు అంగీకరించకపోవడంతో ఆందోళన కొనసాగింది.
Leave a Reply