“ప్రియుడి కారుపై 3,400 లిప్‌స్టిక్ ముద్దులా..!” ప్రేయసి ప్రేమ పిచ్చికి ఫైన్ వేసిన ట్రాఫిక్ పోలీసులు.. వైరల్ రీల్స్‌తో చేతికొచ్చిన చలాన్!

మధ్యప్రదేశ్ రాష్ట్రంలోని గ్వాలియర్‌లో, ప్రియురాలి ప్రేమ ప్రదర్శనతో ఒకరి కారు ఏకంగా 3,400 లిప్‌స్టిక్ ముద్దులతో నిండిపోయిన విచిత్ర ఘటన సోషల్ మీడియాలో విపరీతంగా వైరల్ అవుతోంది.

తన ప్రియుడిపై ఉన్న ప్రేమను వెరైటీగా చాటుకోవాలనుకున్న ఆ యువతి.. ప్రియుడి తెల్లటి కారు అంతటా తన లిప్‌స్టిక్‌తో ముద్దులు పెడుతూ, కారు మొత్తాన్ని ఎర్రటి లిప్‌స్టిక్ గుర్తులమయం చేసింది.

ఈ వింత దృశ్యాన్ని సదరు యువకుడు వీడియో తీసి ‘రీల్స్’ రూపంలో సోషల్ మీడియాలో పోస్ట్ చేశాడు. ఆ వీడియో క్షణాల్లో నెట్టింట వైరల్ అయి లక్షలాది వ్యూస్ సొంతం చేసుకుంది. అయితే, ఈ వైరల్ వీడియో నెటిజన్లనే కాకుండా గ్వాలియర్ ట్రాఫిక్ పోలీసుల దృష్టిని కూడా ఆకర్షించడమే ఇక్కడ అసలు ట్విస్ట్.

నిబంధనలకు విరుద్ధంగా కారు రూపురేఖలను మార్చడం, బహిరంగ రహదారులపై ఇతరుల దృష్టి మరల్చేలా ప్రవర్తించడం, ట్రాఫిక్ నిబంధనలను ఉల్లంఘించడం వంటి కారణాల కింద ట్రాఫిక్ పోలీసులు ఆ యువకుడిని గుర్తించి భారీ జరిమానా (చలాన్) విధించారు.

ప్రియురాలి 3,400 ముద్దుల మురిపెం చూసి పొంగిపోయిన ఆ ప్రియుడికి పోలీసుల చలాన్ దిమ్మతిరిగే షాక్ ఇవ్వగా, ఈ ఉదంతం నెటిజన్లకు మాత్రం కడుపుబ్బా నవ్వు తెప్పిస్తోంది.