“వైద్యో నారాయణో హరిః”.. వైద్యుడిని సాక్షాత్తు ఆ విష్ణుమూర్తితో సమానంగా చూసే సంస్కృతి మనది. కానీ, నేటి కార్పొరేట్ ఆస్పత్రుల ధనదాహం ఆ పవిత్ర వృత్తిని వ్యాపారంగా మార్చేసింది. రోగి ప్రాణం కంటే పర్సులోని పైసలకే ప్రాధాన్యత ఇస్తున్న ప్రైవేట్ ఆస్పత్రుల అసలు స్వరూపాన్ని ఒక యువ వైద్యురాలు నిలదీసింది. ఆస్పత్రిలో జరుగుతున్న దారుణాలను చూడలేక, చేరిన మొదటి రోజే తన పదవికి రాజీనామా చేసి సోషల్ మీడియా వేదికగా ఆమె బయటపెట్టిన నిజాలు ఇప్పుడు దేశవ్యాప్తంగా ప్రకంపనలు సృష్టిస్తున్నాయి.
ఏమిటా ‘కలెక్షన్’ దందా?
చండీగఢ్‌కు చెందిన యువ వైద్యురాలు డాక్టర్ ప్రభ్లీన్ కౌర్ అక్కడి ఒక ప్రతిష్టాత్మక ప్రైవేట్ ఆస్పత్రిలో డాక్టర్‌గా చేరారు. అయితే, ఆస్పత్రి మేనేజ్‌మెంట్ తీరు చూసి ఆమె అవాక్కయ్యారు. ఆస్పత్రికి వచ్చే రోగులను మనుషుల్లా కాకుండా, డబ్బులు కురిపించే యంత్రాల్లా చూస్తున్నారని ఆమె ఆరోపించారు.
- అవసరం లేకున్నా ఐసీయూ: సాధారణ చికిత్సతో నయం అయ్యే రోగులను కూడా కావాలని ఐసీయూ (ICU)లో అడ్మిట్ చేయాలని యాజమాన్యం ఒత్తిడి చేస్తోందని ఆమె వెల్లడించారు.
- టార్గెట్ల వేట: ఆస్పత్రి ఆదాయాన్ని పెంచడానికి డాక్టర్లపై ఒత్తిడి తెస్తూ, రోగులకు అవసరం లేని ఖరీదైన పరీక్షలు, అనవసర చికిత్సలు చేయిస్తున్నారని ప్రభ్లీన్ బాంబు పేల్చారు.
నైతికత ముందా? జీతం ముందా?
ఆస్పత్రిలో జరుగుతున్న ఈ దోపిడీని ఎండగడుతూ ఆమె ఒక వీడియో విడుదల చేశారు. “నాకు పెద్ద జీతం, హోదా కంటే రోగుల ప్రాణాలు, వృత్తి ధర్మమే ముఖ్యం. రోగులను లూటీ చేసే ఈ మాఫియాలో నేను భాగస్వామిని కాలేను. అందుకే మొదటి రోజే నా రాజీనామా లేఖను వారి మొహాన కొట్టి వచ్చేశాను” అంటూ ఆమె ఆవేదన వ్యక్తం చేశారు. ఈ దందాలన్నీ అక్కడి ఒక సీనియర్ డాక్టర్ కనుసన్నల్లోనే జరుగుతున్నాయని ఆమె ఆరోపించడం గమనార్హం.
సోషల్ మీడియాలో ‘ప్రభ్లీన్’ సెన్సేషన్!
ప్రభ్లీన్ కౌర్ ధైర్యాన్ని చూసి నెటిజన్లు నీరాజనాలు పడుతున్నారు. ఈ వీడియో ఇప్పుడు ఇంటర్నెట్‌లో దావానంలా వ్యాపిస్తోంది. “ఇలాంటి డాక్టర్లు ఉండబట్టే ఇంకా వ్యవస్థపై నమ్మకం ఉంది” అంటూ నెటిజన్లు ఆమెకు మద్దతుగా నిలుస్తున్నారు. సదరు ఆస్పత్రి పేరును బహిరంగపరచాలని, వెంటనే దాని లైసెన్స్‌ను రద్దు చేయాలని ప్రజలు డిమాండ్ చేస్తున్నారు.
వైద్య వృత్తిని వ్యాపారంగా మార్చి, సామాన్యుడి రక్తాన్ని పిలుస్తున్న ప్రైవేట్ ఆస్పత్రుల గుట్టును ఒక యువ డాక్టర్ సాహసోపేతంగా రట్టు చేయడం ఇప్పుడు చర్చనీయాంశంగా మారింది.