ప్రపంచంలో అమెరికాకు చెందిన F-35 వంటి 5వ తరం యుద్ధ విమానాలు అత్యంత శక్తివంతమైనవి. ఆ తర్వాత రాఫెల్, సుఖోయ్-57 వంటివి వస్తాయి. అయితే, వీటిని కొనడం కంటే, వాటిని నిర్వహించడం (Operation Cost) అనేది చాలా ఖరీదైన వ్యవహారం. అందుకే భారత్ తన వ్యూహాన్ని మార్చుకొని స్వదేశీ తేజస్ పై భరోసా ఉంచింది.
భారత వైమానిక దళం (IAF) ముందున్న సవాలు: వైమానిక దళానికి మొత్తం 42 స్క్వాడ్రన్లు అవసరం కాగా, ప్రస్తుతం కేవలం 30 మాత్రమే అందుబాటులో ఉన్నాయి (ఒక స్క్వాడ్రన్‌లో 18 విమానాలు ఉంటాయి). పాత విమానాలు రిటైర్ అవుతున్న తరుణంలో, ఈ లోటును పూడ్చడానికి భారత్ 180కి పైగా తేజస్ విమానాలకు ఆర్డర్ ఇచ్చింది.
తేజస్ ఎందుకు వైమానిక దళానికి ఇష్టం? తేజస్ MK-1a అనేది 4+ జనరేషన్ లైట్ వెయిట్ ఫైటర్ జెట్. దీనిని ఎంచుకోవడానికి ప్రధాన కారణం తక్కువ ఖర్చు:
- తేజస్: గంటకు అయ్యే ఖర్చు సుమారు 4 నుండి 8 వేల డాలర్లు.
- రాఫెల్: గంటకు సుమారు 16 నుండి 31 వేల డాలర్లు.
- F-35: గంటకు సుమారు 35 నుండి 42 వేల డాలర్లు.
ఫైటర్ వరల్డ్ ‘ఆల్టో’ అని ఎందుకు అంటారు? కార్ల ప్రపంచంలో ‘ఆల్టో’ ఎలాగైతే తక్కువ ఖర్చుతో ఎక్కువ మైలేజీని ఇస్తుందో, తేజస్ కూడా అంతే. దీని మెయింటెనెన్స్ మరియు ఆపరేషన్ ఖర్చు రాఫెల్ లేదా F-35 కంటే 6 నుండి 8 రెట్లు తక్కువ. అందుకే రక్షణ నిపుణులు దీనిని యుద్ధ విమానాల ‘ఆల్టో’ అని పిలుస్తున్నారు.