ప్రయాగ్రాజ్: ఉత్తరప్రదేశ్లోని ప్రయాగ్రాజ్లో పోటీ పరీక్షల కోసం సిద్ధమవుతున్న ఇద్దరు విద్యార్థినిలపై ఒక లాడ్జి యజమాని కుమారుడు అమానుషంగా దాడి చేశాడు. వారిని జుట్టు పట్టుకుని ఈడ్చి, కత్తులతో బెదిరించిన ఘటన తీవ్ర సంచలనం సృష్టించింది.
ఏం జరిగింది?
అమేథీకి చెందిన 27 ఏళ్ల విద్యార్థిని, ప్రయాగ్రాజ్లోని శివకుటిలో ఉంటూ పోటీ పరీక్షలకు సిద్ధమవుతోంది. ఆమె ఉంటున్న లాడ్జి యజమాని కుమారుడు శుభమ్ ద్వివేది, గత 10 రోజులుగా ఆమెకు ఫోన్లు, అసభ్యకరమైన మెసేజ్లు పంపి వేధిస్తున్నాడు. మే 18న రాత్రి 2 గంటల సమయంలో నిందితుడు మద్యం మత్తులో ఆమె గది తలుపులు తట్టాడు. ఆమె తలుపు తీయకపోవడంతో బయట నుండి గడియ పెట్టాడు.
ఆ విద్యార్థిని పక్క గదిలో ఉన్న మరో విద్యార్థినిని తన గదిలోకి పిలుచుకోగా, ఆ తలుపులను కూడా నిందితుడు బయట నుంచి తాళం వేశాడు. సహాయం కోసం వారు గట్టిగా కేకలు వేయడంతో లాడ్జి యజమాని (శుభమ్ తల్లి) అక్కడికి వచ్చారు. ఆ తర్వాత శుభమ్ తలుపులు తెరిచి, వారిని బూతులు తిడుతూ దాడి చేశాడు. అడ్డుకోబోయిన వారిపై వంటగదిలోని కత్తితో దాడి చేసి గాయపరిచాడు.
పోలీసుల ముందే బెదిరింపులు
సమాచారం అందుకున్న పోలీసులు సంఘటనా స్థలానికి చేరుకుని నిందితుడిని స్టేషన్కు తరలించారు. పోలీసుల సమక్షంలో కూడా నిందితుడు సదరు విద్యార్థినిని గాజు ముక్కలతో దాడి చేస్తానని, చంపేస్తానని బెదిరించాడు. పోలీసులు ఎఫ్ఐఆర్ (FIR) నమోదు చేసి నిందితుడిని అరెస్టు చేసినప్పటికీ, ప్రస్తుతం అతనికి కోర్టు బెయిల్ మంజూరు చేసింది.