2026 ఏప్రిల్ 1 నుండి అమలులోకి వచ్చేలా భారత రిజర్వ్ బ్యాంక్ (RBI) బంగారు రుణ నిబంధనలలో కొన్ని కీలక మార్పులను ప్రకటించింది.
కొత్త నిబంధనల ప్రకారం.. తాకట్టు పెట్టిన బంగారాన్ని 7 రోజుల్లో తిరిగి అప్పగించడం, 75% నుండి 85% వరకు ‘టైర్డ్ LTV’ (బంగారం విలువపై ఇచ్చే అప్పు), స్వచ్ఛత ధృవీకరణ పత్రం తప్పనిసరి మరియు 12 నెలల లోపు ‘బుల్లెట్ రీపేమెంట్’ వంటి మార్పులు వచ్చాయి. ఇకపై బంగారం తాకట్టు పెట్టే ముందు ఈ నియమాలను అర్థం చేసుకోవడం చాలా అవసరం.
1. టైర్డ్ లోన్-టు-వాల్యూ (LTV) విధానం:
గతంలో బ్యాంకులు లేదా ఎన్బిఎఫ్సిలు (NBFC) బంగారం విలువలో గరిష్టంగా 75% వరకు మాత్రమే అప్పు ఇచ్చేవి. కానీ ఏప్రిల్ 1, 2026 నుండి ఇది అంచెలవారీగా (Tiered LTV) మారుతుంది:
- ₹2.5 లక్షల వరకు రుణం: బంగారం విలువలో 85% వరకు అప్పు పొందవచ్చు.
- ₹2.5 లక్షల నుండి ₹5 లక్షల వరకు: ఈ పరిమితి 80% గా ఉంటుంది.
- ₹5 లక్షల కంటే ఎక్కువ రుణం: కేవలం 75% వరకు మాత్రమే అప్పు ఇస్తారు.
2. పరిమితులు మరియు నియమాలు:
- గరిష్ట పరిమితి: ఒక వ్యక్తి గరిష్టంగా 1 కిలో బంగారాన్ని మాత్రమే తాకట్టు పెట్టి రుణం పొందే వీలుంది.
- నాణేలు/బిస్కెట్లు: బంగారు నాణేలపై గరిష్టంగా 50 గ్రాముల వరకు మాత్రమే రుణం ఇస్తారు. అయితే, గోల్డ్ బార్స్ లేదా బిస్కెట్లను రుణాల కోసం అంగీకరించరు.
- ధృవీకరణ: రుణదాతలు బంగారం స్వచ్ఛతపై సర్టిఫికేట్ ఇవ్వాలి. అలాగే కస్టమర్లు ఆ బంగారం తమదేనని నిరూపించే పత్రాలను సమర్పించాలి.
- బుల్లెట్ రీపేమెంట్: ఈ పద్ధతిలో తీసుకున్న రుణాలను 12 నెలల లోపు పూర్తిగా చెల్లించాలి.
3. బంగారం విలువ లెక్కింపు (Valuation):
బంగారం ధరను లెక్కించే విధానంలో కూడా మార్పు వచ్చింది. గత 30 రోజుల సగటు ధర లేదా ముందటి రోజు ముగింపు ధర – ఈ రెండింటిలో ఏది తక్కువగా ఉంటే దాని ఆధారంగానే మీ బంగారం విలువను కడతారు. దీని కోసం ఇండియన్ బులియన్ అండ్ జ్యువెలర్స్ అసోసియేషన్ (IBJA) డేటాను ఉపయోగిస్తారు. ఇది మీరు పొందే రుణ మొత్తంపై నేరుగా ప్రభావం చూపుతుంది.
వడ్డీ రేట్లు, అపరాధ రుసుములు (Penalties) వంటి వివరాలన్నీ బ్యాంకు వారు కస్టమర్కు ముందే స్పష్టంగా తెలియజేయాలి.