బంగ్లాదేశ్ రాజధాని ఢాకాలో హింసాత్మక ఘటనలు సద్దుమణిగినట్లు కనిపిస్తున్నప్పటికీ, రాజకీయ ఉద్రిక్తతలు మాత్రం తారాస్థాయికి చేరాయి. దేశంలోని ప్రస్తుత పరిస్థితులకు మరియు భారత్‌తో దెబ్బతిన్న సంబంధాలకు తాత్కాలిక ప్రభుత్వ అధినేత మొహమ్మద్ యూనస్ పూర్తి బాధ్యుడని మాజీ ప్రధాని షేక్ హసీనా ధ్వజమెత్తారు.
న్యూస్ ఏజెన్సీ ANI కి ఇచ్చిన ఈమెయిల్ ఇంటర్వ్యూలో షేక్ హసీనా తన ఆవేదనను, ఆగ్రహాన్ని వ్యక్తం చేశారు. ఆమె మాట్లాడిన ముఖ్యాంశాలు ఇవే:
భారత్-బంగ్లాదేశ్ సంబంధాలపై:
- సంబంధాల విచ్ఛిన్నం: ప్రస్తుత ఉద్రిక్తతలకు యూనస్ ప్రభుత్వమే కారణమని హసీనా ఆరోపించారు. యూనస్ ప్రభుత్వం భారత్‌కు వ్యతిరేకంగా శత్రుత్వపూరిత ప్రకటనలు చేస్తోందని, మతపరమైన మైనారిటీలను రక్షించడంలో విఫలమైందని మండిపడ్డారు.
- మతోన్మాదం: విదేశీ విధానాన్ని నిర్ణయించే అధికారాన్ని తీవ్రవాదులకు ఇచ్చారని, మళ్ళీ సంబంధాలు దెబ్బతిన్నాయని ఆ ప్రభుత్వమే ఆశ్చర్యం వ్యక్తం చేయడం విడ్డూరంగా ఉందని ఆమె అన్నారు.
- నమ్మకమైన స్నేహితుడు: భారత్ దశాబ్దాలుగా బంగ్లాదేశ్‌కు అత్యంత నమ్మకమైన స్నేహితుడని, ఈ బంధం ఏదో ఒక తాత్కాలిక ప్రభుత్వం కంటే చాలా బలమైనదని ఆమె గుర్తు చేశారు.
హింస మరియు మతపరమైన దాడులు: ఇటీవల దీప్ చంద్ర దాస్ అనే హిందూ యువకుడిని దారుణంగా కొట్టి చంపిన ఘటనను ప్రస్తావిస్తూ.. గతంలో తన ప్రభుత్వాన్ని పడగొట్టడానికి కారణమైన అరాచకం కంటే, ఇప్పుడు యూనస్ పాలనలో చట్టరాహిత్యం ఎన్నో రెట్లు పెరిగిందని ఆమె విమర్శించారు.
ఎన్నికలపై హెచ్చరిక:
- అవామీ లీగ్ లేకుండా ఎన్నికలు ఉండవు: అవామీ లీగ్ పార్టీ లేకుండా జరిగే ఎన్నికలు ఏమాత్రం నిష్పక్షపాతంగా ఉండవని, అది కేవలం ‘పట్టాభిషేకం’ మాత్రమే అవుతుందని హసీనా అన్నారు.
- ఓటర్ల బహిష్కరణ: ప్రజలకు నచ్చిన పార్టీకి ఓటు వేసే అవకాశం లేకపోతే, లక్షలాది మంది ఓటింగ్‌కు దూరంగా ఉంటారని, అప్పుడు ఏర్పడే ప్రభుత్వానికి నైతిక హక్కు ఉండదని ఆమె హెచ్చరించారు.
భారత్‌కు కృతజ్ఞతలు: తనను అప్పగించాలన్న డిమాండ్‌లపై స్పందిస్తూ.. దిక్కుతోచని స్థితిలో ఉన్న యూనస్ ప్రభుత్వం ఇలాంటి వింతైన డిమాండ్లు చేస్తోందని అన్నారు. తనకు ఆశ్రయం కల్పించి, గౌరవం ఇచ్చిన భారత్‌కు మరియు ఆమెకు మద్దతుగా నిలిచిన భారత రాజకీయ పార్టీలకు షేక్ హసీనా కృతజ్ఞతలు తెలిపారు. రక్తపాతం నివారించడానికే తాను దేశం విడిచానని, న్యాయస్థానాలను ఎదుర్కోవడానికి తాను భయపడనని ఆమె స్పష్టం చేశారు.