బంగ్లాదేశ్‌లో ఉద్రిక్తతలు కొనసాగుతుండగానే, తాజాగా ఎన్‌సీపీ (NCP) నేత ఒకరు కాల్పులకు గురయ్యారు. ఖుల్నాలో జరిగిన ఈ ఘటనలో మోతాలెబ్ సిక్దర్ అనే నేత తలలోకి దుండగులు కాల్పులు జరిపారు. మోతాలెబ్ ఎన్‌సీపీ ఖుల్నా విభాగం అధిపతిగా మరియు పార్టీ కార్మిక విభాగం కేంద్ర నిర్వాహకుడిగా పనిచేస్తున్నారు. ప్రస్తుతం ఆయన పరిస్థితి విషమంగా ఉండటంతో ఖుల్నా మెడికల్ కాలేజీ ఆసుపత్రిలో చేర్పించారు. ఎన్‌సీపీ సంయుక్త ముఖ్య నిర్వాహకురాలు మహమూదా మితు మరియు సోనాడంగా పోలీస్ స్టేషన్ ఓసీ రఫీకుల్ ఇస్లాం ఈ ఘటనను ధృవీకరించారు.
ఘటన వివరాలు: కాల్పుల అనంతరం మోతాలెబ్ ఎడమ కంటి వైపు తీవ్ర గాయమైందని, భారీగా రక్తస్రావం జరిగిందని సమాచారం. ఆయన నేలకూలగానే స్థానికులు రక్షించి ఆసుపత్రికి తరలించారు. తలలో బుల్లెట్ తీవ్రతను అంచనా వేయడానికి సిటీ స్కాన్ కోసం షేక్‌పరా ఇమేజింగ్ సెంటర్‌కు తరలించారు. నిందితులను పట్టుకోవడానికి పోలీసులు వివిధ ప్రాంతాల్లో గాలింపు చర్యలు చేపట్టారు.
నేపథ్యం – ఉస్మాన్ హాదీ కేసు మరియు భారత్ వ్యతిరేకత: డిసెంబర్ 12న ఢాకాలో ఉస్మాన్ హాదీపై కాల్పులు జరగడం, ఆయన డిసెంబర్ 18న సింగపూర్ ఆసుపత్రిలో మరణించడం బంగ్లాదేశ్‌లో తీవ్ర అలజడికి కారణమైంది. హాదీ హత్య వెనుక భారత్ హస్తం ఉందంటూ, నిందితుడు ఫైసల్ కరీమ్ భారత్‌కు పారిపోయాడంటూ అక్కడి కట్టర్ పంథీలు ప్రచారం చేస్తున్నారు. దీనివల్ల భారత హైకమిషన్ కార్యాలయాలపై దాడులకు ప్రయత్నాలు జరిగాయి.
అయితే, ఈ ఆరోపణలపై బంగ్లాదేశ్ అదనపు ఐజీ ఖందకర్ రఫీకుల్ ఇస్లాం స్పందిస్తూ.. నిందితుడు ఫైసల్ కరీమ్ సరిహద్దు దాటి వెళ్ళాడా లేదా అనే దానిపై ఖచ్చితమైన సమాచారం లేదని తెలిపారు. దర్యాప్తు సంస్థలను తప్పుదోవ పట్టించడానికి నిందితులు కావాలనే తప్పుడు సమాచారాన్ని వ్యాప్తి చేస్తారని ఆయన పేర్కొన్నారు.
బంగ్లాదేశ్‌లో కొనసాగుతున్న విధ్వంసం: హాదీ మరణం తర్వాత బంగ్లాదేశ్ అంతటా ఆందోళనలు మిన్నంటాయి. ఇన్కిలాబ్ మంచ్ మద్దతుదారులు మరియు హసీనా వ్యతిరేకులు ఢాకా, రాజ్‌షాహి వంటి ప్రాంతాల్లో విధ్వంసానికి దిగారు. ధన్మండిలోని బంగబంధు నివాసంపై దాడి చేసి నిప్పు పెట్టారు. అవామీ లీగ్ కార్యాలయాలు, ‘ప్రథమ్ ఆలో’ మరియు ‘డైలీ స్టార్’ పత్రికల కార్యాలయాలపై కూడా దాడులు జరిగాయి. ఈ నిరసనల్లో భారత్ వ్యతిరేక నినాదాలు మిన్నంటాయి.