ఉత్తరప్రదేశ్ రాష్ట్రం బరేలీలోని బిథ్రి చైన్పూర్ ప్రాంతంలో ఒక హృదయవిదారక ఘటన చోటుచేసుకుంది. 21 ఏళ్ల యువకుడు విషం తాగి ఆత్మహత్య చేసుకున్నాడు. తన ప్రేయసికి మొబైల్ ఫోన్ కొనిచ్చినందుకు, ఆమె కుటుంబ సభ్యులు తనపై దాడి చేశారని, ఆ అవమానంతోనే యువకుడు మనస్తాపానికి గురై ఈ అఘాయిత్యానికి పాల్పడ్డాడని కుటుంబ సభ్యులు ఆరోపిస్తున్నారు. బాధితుల ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు.
ఘటన వివరాలు: మృతుడిని మోహన్పూర్ రామ్నగర్ నివాసి ఆదిత్య శర్మగా గుర్తించారు. ఆదిత్య తన తండ్రి గంగాదేవ్ శర్మతో కలిసి వృత్తిరీత్యా వడ్రంగి పని చేసేవాడు. గతంలో వారు జగత్పూర్ ప్రాంతంలో అద్దె ఇంట్లో ఉండేవారు, అక్కడ పొరుగున ఉండే యువతితో ఆదిత్యకు చిన్నప్పటి నుంచి పరిచయం ఉంది. జూన్ 23న ఆదిత్య, ఆ యువతితో కలిసి కొత్త మొబైల్ ఫోన్ కొనడానికి బట్లర్ ప్లాజా మార్కెట్కు వెళ్లాడు. ఫోన్ కొన్న తర్వాత ఇద్దరూ ఆదిత్య నానమ్మ ఇంటికి వెళ్లడం వల్ల, తిరిగి ఇంటికి రావడానికి ఆలస్యమైంది.
ఇంటికి చేరగానే గొడవ: యువతి ఇంటికి ఆలస్యంగా రావడంతో, ఆమె తండ్రి, సోదరుడు మరియు ఇతర బంధువులు ఆదిత్య ఇంటికి చేరుకున్నారు. ఆదిత్యను వెంటనే ఇంటికి రమ్మని ఫోన్ చేశారు. ఆదిత్య యువతితో కలిసి ఇంటికి రాగానే, కుటుంబ సభ్యులు యువతిని తీసుకెళ్లిపోయారు. అయితే, ఆ తర్వాత కూడా యువతి కుటుంబ సభ్యులు ఆదిత్యతో దురుసుగా ప్రవర్తించి, అతడిపై దాడి చేశారు. ఆదిత్య తండ్రి ఎంత వారించినా వినకుండా వారు ఆదిత్యను చితకబాదారు. స్థానికులు అక్కడికి రావడంతో నిందితులు అక్కడి నుంచి వెళ్లిపోయారు.
‘నేను విషం తాగాను’: ఈ దాడి ఘటనతో ఆదిత్య తీవ్ర మానసిక వేదనకు గురయ్యాడు. మరుసటి రోజు ఇంటి నుంచి బయటకు వెళ్లిపోయాడు. సాయంత్రం వేళ ఆదిత్య తన తల్లిదండ్రులకు ఫోన్ చేసి, తాను ‘సల్ఫాస్’ (విషం) తాగానని చెప్పాడు. వెంటనే అప్రమత్తమైన కుటుంబ సభ్యులు అతన్ని ఆసుపత్రికి తరలించగా, అక్కడ చికిత్స పొందుతూ ఈరోజు మరణించాడు.
పోలీసుల దర్యాప్తు: ఘటనపై సమాచారం అందుకున్న పోలీసులు మృతదేహాన్ని పోస్టుమార్టం నిమిత్తం తరలించారు. కుటుంబ సభ్యుల ఫిర్యాదు మేరకు కేసు నమోదు చేశామని, దర్యాప్తులో వెల్లడయ్యే వాస్తవాల ఆధారంగా కఠిన చర్యలు తీసుకుంటామని పోలీసులు తెలిపారు.