మనామా: ఇరాన్ కేవలం ఇజ్రాయెల్‌పైనే దాడులు చేయడం లేదు. దానికి బదులుగా పొరుగు దేశాల్లోని అమెరికా సైనిక కేంద్రాలపై, అమెరికాకు సహకరిస్తున్న దేశాల ఆర్థిక మండలాలపై కూడా దాడులు చేస్తోంది.
దీనివల్ల బహ్రెయిన్‌లోని అమెరికా 5వ నౌకాదళానికి (5th Fleet) పెద్ద చిక్కు వచ్చి పడింది. ఈ నౌకాదళం నుంచే అమెరికా నిరంతరం ఇరాన్‌పై దాడులు చేస్తోంది. కాబట్టి దీనికి ప్రతీకారంగా ఇరాన్ ఇప్పుడు పూర్తి వేగంతో రంగంలోకి దిగింది.
అమెరికా సైనిక స్థావరం
గల్ఫ్ దేశాలలో అమెరికాకు అనేక సైనిక స్థావరాలు ఉన్నాయి. వాటిలో ముఖ్యమైనది బహ్రెయిన్‌లోని 5వ నౌకాదళ విభాగం. ఇతర గల్ఫ్ దేశాలలో స్థావరాలు ఉన్నప్పటికీ, బహ్రెయిన్‌లోని ఈ నౌకాదళ స్థావరం అమెరికా రక్షణ వ్యవస్థకు “గుండెకాయ” వంటిది. సముద్ర మార్గం ద్వారా జరిగే ముడి చమురు సరఫరాలో 20% హార్ముజ్ జలసంధి (Strait of Hormuz) గుండానే వెళ్తుందని అందరికీ తెలిసిందే. ఈ జలసంధిని రక్షించే బాధ్యత ఈ 5వ నౌకాదళానిదే.
ఏం జరిగింది?
ఈ స్థావరం నిరంతరం పనిచేయాలంటే ఇంధనం చాలా ముఖ్యం. ఈ ఇంధనాన్ని బహ్రెయిన్‌లోని ‘బాప్కో’ (Bapco) చమురు శుద్ధి కర్మాగారం సరఫరా చేస్తుంది. ఇరాన్ సరిగ్గా ఈ కేంద్రంపైనే దాడి చేసింది. ఈ దాడికి సంబంధించిన వీడియోలు సోషల్ మీడియాలో వైరల్ అవుతున్నాయి. దాడి కారణంగా ఈ ప్లాంట్‌ను తాత్కాలికంగా మూసివేశారు. ఈ దాడిలో ఎటువంటి ప్రాణనష్టం జరగలేదని, మంటలు అదుపులోకి వచ్చాయని బహ్రెయిన్ వివరించింది. అయినప్పటికీ పరిస్థితి చాలా తీవ్రంగా మారింది.
పైచేయి సాధిస్తున్న ఇరాన్
అమెరికా ఆయుధ బలం చాలా పెద్దది. నేరుగా పోరాడి గెలవలేమని ఇరాన్‌కు తెలుసు. అందుకే అమెరికాకు అందే సరఫరా గొలుసును (Supply Chain) దెబ్బతీయాలని ఇరాన్ ప్రయత్నిస్తోంది. ఇంధన సరఫరా నిలిచిపోతే నౌకాదళం బలహీనపడుతుందనేది ఇరాన్ ఎత్తుగడ.
చమురు నిల్వలపై దాడులు
కేవలం బహ్రెయిన్ మాత్రమే కాదు, అమెరికాకు ఇంధనాన్ని సరఫరా చేసే ఇతర దేశాల చమురు నిల్వలపై కూడా ఇరాన్ బాంబులు కురిపించింది. ఈ దాడులను భారత్ సహా పలు దేశాలు ఖండిస్తున్నాయి. అయినప్పటికీ దాడులను ఆపే ప్రసక్తే లేదని ఇరాన్ స్పష్టం చేస్తోంది.