హిందూ వితంతువులైపై సామూహిక అత్యాచారం: పొరుగు దేశమైన బాంగ్లాదేశ్‌లో మైనారిటీ సమాజంపై దాడులు ఆగడం లేదు. హిందువులపై జరుగుతున్న అకృత్యాలు రోజురోజుకూ మరింత భయంకరంగా మారుతున్నాయి. తాజాగా మానవత్వాన్ని సిగ్గుచేటు చేసేలా ఒక హృదయ విదారక ఘటన వెలుగులోకి వచ్చింది. బాంగ్లాదేశ్‌లోని జెనైదా జిల్లా, కాళీగంజ్ ప్రాంతంలో 40 ఏళ్ల హిందూ వితంతువుపై దుండగులు సామూహిక అత్యాచారానికి పాల్పడ్డారు.
అంతేకాకుండా, ఆ కిరాతకులు ఆమెను అవమానించడానికి ఒక చెట్టుకు కట్టేసి, బలవంతంగా ఆమె జుట్టును కత్తిరించారు.
అసలేం జరిగింది?
ఈ దారుణ ఘటన 2026, జనవరి 3వ తేదీ శనివారం సాయంత్రం జరిగింది. బాధితురాలు తన భర్త మరణించిన తర్వాత తన బిడ్డతో ఒంటరిగా నివసిస్తోంది. పోలీసు ఫిర్యాదు ప్రకారం, బాధితురాలు రెండున్నర ఏళ్ల క్రితం నదీపారా నివాసి షాహీన్ అనే వ్యక్తి నుండి రూ. 20 లక్షలకు కొంత భూమిని, ఇల్లును కొనుగోలు చేసింది. ఈ ఒప్పందం తర్వాత షాహీన్ దృష్టి ఆమె ఆస్తిపై పడింది, అప్పటి నుండి ఆమెను తరచుగా వేధించేవాడు.
సంఘటన జరిగిన రోజున, బాధితురాలి ఇంటికి ఆమె బంధువులు ఇద్దరు వచ్చారు. ఆ సమయంలో షాహీన్ మరియు అతని అనుచరుడు హసన్ బలవంతంగా ఇంట్లోకి చొరబడ్డారు. ముందుగా బంధువులను కొట్టి అక్కడి నుండి తరిమేసిన నిందితులు, మహిళను 50,000 రూపాయలు ఇవ్వాలని బెదిరించారు. ఆమె నిరాకరించడంతో, ఆ ఇద్దరూ ఆమెపై లైంగిక దాడికి పాల్పడ్డారు.
క్రూరత్వానికి హద్దుల్లేవు
నిందితుల ఆగడాలు అక్కడితో ఆగలేదు. ఆమె కేకలు వేయకుండా ఇంటి బయటకు లాక్కొచ్చి, ఒక చెట్టుకు కట్టేసి బహిరంగంగా ఆమె జుట్టును కత్తిరించారు. ఈ మొత్తం ఉదంతాన్ని వారు వీడియో తీసి సోషల్ మీడియాలో వైరల్ చేశారు. నిందితుల దాడిలో స్పృహ కోల్పోయిన ఆమెను స్థానికులు ఆసుపత్రికి తరలించారు. ఆసుపత్రి వైద్యుడు మహ్మద్ ముస్తాఫిజుర్ రెహ్మాన్ వైద్య పరీక్షల అనంతరం అత్యాచారం జరిగినట్లు ధృవీకరించారు.
మొదట భయంతో మౌనంగా ఉన్న బాధితురాలు, తర్వాత ధైర్యం తెచ్చుకుని కాళీగంజ్ పోలీస్ స్టేషన్‌లో ఫిర్యాదు చేసింది.
పోలీసుల స్పందన
జెనైదా అడిషనల్ ఎస్పీ బిలాల్ హుస్సేన్ మీడియాకు మాట్లాడుతూ.. “మేము బాధితురాలి ఫిర్యాదును నమోదు చేసాము. ఈ విషయంపై తీవ్రస్థాయిలో దర్యాప్తు జరుగుతోంది. నిందితులు షాహీన్ మరియు హసన్‌లపై కఠిన చట్టపరమైన చర్యలు తీసుకుంటాము” అని తెలిపారు. ఈ ఘటనతో స్థానిక హిందూ సమాజంలో తీవ్ర భయాందోళనలు, ఆగ్రహావేశాలు వ్యక్తమవుతున్నాయి.