సింగర్-రాపర్ బాద్‌షా పాడిన హర్యానా సాంగ్ ‘టిటరీ’ వివాదంలోకి ఇప్పుడు లారెన్స్ బిష్ణోయ్ గ్యాంగ్ ఎంట్రీ ఇచ్చింది. పానిపట్‌లో జరిగిన ఒక కాల్పుల ఘటనకు బాధ్యత వహిస్తూనే, ఫేస్‌బుక్ పోస్ట్ ద్వారా బాద్‌షాకు “నేరుగా నుదుటిపైనే కాలుస్తాం” అంటూ ఈ ముఠా మరణ హెచ్చరికలు జారీ చేసింది.
బాద్‌షా తన గానం ద్వారా హర్యానా సంస్కృతిని చెడగొడుతున్నారని ఈ గ్యాంగ్ ఆరోపిస్తోంది.
కాల్పుల ఘటన మరియు హెచ్చరిక:
శనివారం (మార్చి 14) పానిపట్‌లోని అసంద్ రోడ్డులో ఉన్న వెస్ట్రన్ యూనియన్ కార్యాలయంపై జరిగిన కాల్పుల ఘటనకు లారెన్స్ బిష్ణోయ్ ముఠాకు చెందిన రందీప్ మాలిక్, అనిల్ పండిట్ బాధ్యత వహించారు. సోషల్ మీడియా పోస్ట్‌లో వారు మాట్లాడుతూ.. “హవాలా వ్యాపారులకు ఇదొక ట్రైలర్ మాత్రమే” అని పేర్కొన్నారు.
అదే పోస్ట్ చివరలో బాద్‌షా గురించి ఇలా రాశారు:
“సింగర్ బాద్‌షా, నువ్వు హర్యానా సంస్కృతిని నాశనం చేయడానికి ప్రయత్నించావు. 2024లో నీ క్లబ్‌లో నీకు ట్రైలర్ చూపించాం, వచ్చేసారి నేరుగా నీ నుదుటిపైనే కాలుస్తాం.”
వివాదానికి కారణం ఏంటి?
మార్చి 1న విడుదలైన బాద్‌షా పాట ‘టిటరీ’ చట్టపరమైన చిక్కుల్లో పడింది. ఈ పాటలోని సాహిత్యం మరియు దృశ్యాలు అభ్యంతరకరంగా ఉన్నాయని హర్యానా మహిళా కమిషన్ ఫిర్యాదు చేసింది. వివాదం ముదరడంతో ఈ పాటను పలు ప్లాట్‌ఫారమ్‌ల నుండి తొలగించారు. బాద్‌షా ఇప్పటికే దీనిపై బహిరంగంగా క్షమాపణలు చెప్పినప్పటికీ, లారెన్స్ బిష్ణోయ్ గ్యాంగ్ ప్రమేయంతో ఈ వ్యవహారం ఇప్పుడు సంచలనంగా మారింది.
కొందరు కళాకారులు బాద్‌షాకు మద్దతుగా నిలుస్తున్నారు. రాపర్ల సాహిత్యం అనేది వారి పోటీ కోసం రాసుకునేవే తప్ప, మహిళలను లేదా ఏ ఒక్క వ్యక్తిని ఉద్దేశించినవి కావని వారు వాదిస్తున్నారు.