బాబర్ ఆజం మాటకే విలువ లేదా..! “అభిమానంతో మైదానంలోకి దూసుకొచ్చిన ఫ్యాన్”.. వదిలేయమని కెప్టెన్ చెప్పినా వినకుండా ఎత్తుకెళ్లిన సెక్యూరిటీ సిబ్బంది.. పాకిస్థాన్‌లో ఇంతేనా..? వీడియో వైరల్..!

పాకిస్థాన్‌లోని అబోటాబాద్ (Abbottabad) స్టేడియంలో క్రికెట్ మ్యాచ్ జరుగుతుండగా, స్టార్ ఆటగాడు బాబర్ ఆజంను కలవడం కోసం ఓ అభిమాని భద్రతా వలయాన్ని దాటుకుని ఒక్కసారిగా మైదానంలోకి దూసుకొచ్చిన ఘటన తీవ్ర కలకలం రేపింది. స్టేడియం భద్రతా సిబ్బంది కళ్లుగప్పి ఆ అభిమాని బాబర్ ఆజం వద్దకు వెళ్లి కొన్ని సెకన్ల పాటు మాట్లాడాడు. వెంటనే అప్రమత్తమైన సెక్యూరిటీ సిబ్బంది అతడిని పట్టుకుని మైదానం నుంచి బయటకు లాక్కెళ్లారు.

మైదానంలోకి చొరబడిన అభిమానిని చుట్టుముట్టిన భద్రతా సిబ్బంది, అతడిని తమ అదుపులోకి తీసుకుని తీసుకెళ్లారు. ఇది గమనించిన బాబర్ ఆజం వెంటనే ఆ అభిమానికి సహాయం చేసేందుకు ప్రయత్నించాడు. తన సహచర ఆటగాడు జహందాద్ ఖాన్‌ను (Jahandad Khan) భద్రతా అధికారుల వద్దకు పంపి, ఆ అభిమానిపై ఎలాంటి చర్యలు తీసుకోకుండా వదిలేయాలని కోరాడు.

బాబర్ ఆజం విజ్ఞప్తి మేరకు జహందాద్ ఖాన్ భద్రతా సిబ్బందితో మాట్లాడినప్పటికీ, అధికారులు మాత్రం ఆ అభిమానిని అక్కడికక్కడే విడిచిపెట్టడానికి నిరాకరించారు. స్టేడియం భద్రతా నిబంధనల ప్రకారం ఆ వ్యక్తిని తమ అదుపులోనే ఉంచుకుని మైదానం వెలుపలికి తీసుకెళ్లారు. దీంతో అక్కడ కాసేపు ఉత్కంఠభరిత వాతావరణం నెలకొంది.

ఇటీవల పాకిస్థాన్ జట్టు వరుస ఓటములను ఎదుర్కొంటుండటం, బాబర్ ఆజం కూడా తన స్థాయికి తగ్గ ప్రదర్శన చేయలేక విమర్శలు ఎదుర్కొంటుండటంతో ఆయనపై అసంతృప్తి నెలకొన్నట్లు వార్తలు వచ్చాయి. అయినప్పటికీ, పాకిస్థాన్ అభిమానుల్లో బాబర్ ఆజంకు ఉన్న ఆదరణ ఏమాత్రం తగ్గలేదని, ఆయనపై అభిమానులకు ఇంకా అమితమైన ప్రేమ ఉందని ఈ ఘటన మరోసారి రుజువు చేసింది. అదే సమయంలో, బాబర్ స్వయంగా అంతగా చెప్పినా సెక్యూరిటీ సిబ్బంది ఆ అభిమానిని వదలకుండా అదుపులోకి తీసుకోవడంతో.. పాకిస్థాన్‌లో ఆయన మాటకు కనీస గౌరవం కూడా లేదా అనే విమర్శలకు ఈ సంఘటన తావిస్తోంది.