ఉత్తరప్రదేశ్‌లోని బిజ్నోర్ జిల్లా నందపూర్ అనే చిన్న గ్రామంలో ప్రస్తుతం ఒక వింత దృశ్యం కనిపిస్తోంది. సాధారణంగా ఆలయాల్లో దైవ దర్శనం చేసుకోవడం చూస్తాం, కానీ ఇక్కడ ఒక కుక్క గత నాలుగు రోజులుగా ఆగకుండా ప్రదక్షిణలు చేస్తోంది. దీంతో గ్రామస్థులంతా ఆ కుక్కను ‘కుక్క మహారాజ్’ (కుత్తా మహారాజ్) అని పిలవడం మొదలుపెట్టారు.
కేవలం గ్రామస్థులే కాకుండా, చుట్టుపక్కల ప్రాంతాల నుండి కూడా ప్రజలు భారీగా తరలివస్తున్నారు.
గ్రామంలో ఆధ్యాత్మిక వాతావరణం:
నందపూర్ గ్రామంలో ఈ ఘటన ఇప్పుడు భక్తి మరియు ఉత్సుకతకు కేంద్రంగా మారింది. నాలుగు రోజుల పాటు వరుసగా ప్రదక్షిణలు చేసిన ఆ కుక్కను గ్రామస్థులు భగవంతుడి అవతారంగా భావిస్తూ పూజలు చేస్తున్నారు. అక్కడ వాతావరణం చూస్తుంటే ఏదో పెద్ద ఆధ్యాత్మిక ఉత్సవం జరుగుతున్నట్లుగా ఉంది. కుక్కను చూడటానికి దూరం నుండి జనం వస్తున్నారు, కొందరు దాని ముందు సాష్టాంగ నమస్కారం చేస్తుంటే, మరికొందరు దానికి ఆహారం అందిస్తూ సేవ చేస్తున్నారు.
నాలుగు రోజుల ప్రదక్షిణ.. ఆపై విశ్రాంతి:
ఆ కుక్క వరుసగా నాలుగు రోజుల పాటు గ్రామంలో ప్రదక్షిణలు చేస్తూనే ఉంది. ప్రస్తుతం అలసట కారణంగా అది ఒక చోట కూర్చుండిపోయింది, అయినా ప్రజల భక్తి ఏమాత్రం తగ్గలేదు. ఈ విషయం తెలుసుకున్న అధికారులు, వెటర్నరీ డాక్టర్ల బృందాన్ని అక్కడికి పంపారు. వైద్యులు ఆ కుక్కను పరీక్షించి, దానికి ఎటువంటి అనారోగ్య లక్షణాలు లేవని తేల్చి చెప్పారు. అయినప్పటికీ, ఇది సాధారణ విషయం కాదని, ఏదో “దైవిక సంకేతం” అని గ్రామస్థులు బలంగా నమ్ముతున్నారు.
ప్రజలు ఏమంటున్నారంటే:
ఒక స్థానిక నివాసి మాట్లాడుతూ.. “నాలుగు రోజులుగా ఈ కుక్క ప్రదక్షిణలు చేస్తోంది. మేము దీనిని భైరవ బాబా రూపంగా భావిస్తున్నాము. ఈ రోజు అది విశ్రాంతి తీసుకుంటోంది. కొందరు దానికి ఏదో సమస్య ఉందని అనుకున్నారు కానీ, డాక్టర్లు వచ్చి పరీక్షించి ఎటువంటి అనారోగ్యం లేదని చెప్పారు. మేము మాత్రం దీనిని దైవ స్వరూపంగానే నమ్ముతున్నాము” అని పేర్కొన్నారు.