తొమ్మిది నెలలు మోసి కన్న బిడ్డ ముఖం చూడాలని ఏ తల్లికైనా ఆశగా ఉంటుంది. కానీ, ఉత్తరప్రదేశ్‌లో జరిగిన ఒక ఘటనలో, ఒక తల్లి తన బిడ్డకు పాలివ్వడానికి కూడా నిరాకరించింది. చివరకు ఆ బిడ్డను ఎక్కడైనా పారేయండి అని అనడం అందరినీ కలిచివేసింది.
అసలేం జరిగింది? గోరఖ్‌పూర్ జిల్లా ఆసుపత్రిలో డిసెంబర్ 15న ఒక మహిళ మగబిడ్డకు జన్మనిచ్చింది. ఆ బిడ్డ శ్వాస తీసుకోవడంలో ఇబ్బంది పడుతుండటంతో ఐసీయూ (SNU) లో చేర్చారు. అయితే, ఆ తల్లి తన బిడ్డను చూడటానికి కానీ, పాలివ్వడానికి కానీ ఒప్పుకోలేదు. “ఈ బిడ్డను ఎక్కడైనా వదిలేయండి, కావాలంటే చెత్తలో పారేయండి” అని ఆమె అనడంతో డాక్టర్లు సైతం దిగ్భ్రాంతికి గురయ్యారు.
ఆ తల్లి అంత కఠినంగా ఎందుకు మారింది? ఆమె తన దీనగాథను ఇలా వివరించింది: “ఏడాది క్రితం నాకు వివాహమైంది. నా భర్త డ్రైవర్. మేం ఢిల్లీలో ఉండేవారం. నేను నాలుగు నెలల గర్భిణిగా ఉన్నప్పుడు నా భర్త వేరే అమ్మాయితో కలిసి పారిపోయాడు. నా ఫోన్ నంబర్‌ను బ్లాక్ చేశాడు. నాకు తల్లిదండ్రులు లేరు, అత్తగారు ఉన్నా ఆమెతో సంబంధం లేదు. ఒక్కదాన్నే ఇళ్లలో వంటలు చేస్తూ బతికాను. ప్రసవం కోసం సొంతూరికి వెళ్తుండగా రైలులో నొప్పులు రావడంతో జీఆర్‌పీ పోలీసులు నన్ను ఆసుపత్రిలో చేర్చారు.”
భర్త తనను మోసం చేసి వెళ్ళిపోయాడనే ఆక్రోశం, ఒంటరిగా బిడ్డను ఎలా పెంచాలనే భయం ఆమెను అలా మాట్లాడేలా చేశాయి. “నా భర్త నన్ను తల్లిని చేసి వదిలేశాడు. నా జీవితాన్ని నేను ఎందుకు త్యాగం చేయాలి?” అని ఆమె కన్నీరు పెట్టుకుంది.
48 గంటల తర్వాత మారిన మనసు: ఆసుపత్రి సిబ్బంది ఆమెకు రెండు రోజుల పాటు కౌన్సెలింగ్ ఇచ్చారు. ఆ బిడ్డను దత్తత తీసుకోవడానికి చాలా మంది ముందుకు వచ్చారు. తన బిడ్డను నిజంగానే వేరే వాళ్లకు ఇచ్చేస్తున్నారని గ్రహించిన ఆ తల్లి మనసు మారింది. తన బిడ్డను దూరం చేసుకోలేక క్షమాపణలు చెప్పి, 48 గంటల తర్వాత బిడ్డను దగ్గరకు తీసుకుని పాలిచ్చింది.
ఆమె ఢిల్లీలో పనిచేసే యజమానులు కూడా సహాయం చేయడానికి ముందుకు వచ్చారు. “నీ బిడ్డకు తండ్రి లేకపోయినా పర్వాలేదు, తల్లిగా నువ్వు ఉన్నావు” అని వారు ధైర్యం చెప్పారు. ప్రస్తుతం తల్లి, బిడ్డ ఇద్దరూ క్షేమంగా ఉన్నారు.