లక్నో: ఒక మైనర్ బాలికపై అత్యాచారానికి పాల్పడిన కేసులో నిందితుడిగా ఉన్న ఒక సస్పెండ్ చేయబడిన పోలీస్ కానిస్టేబుల్, పోలీసుల నుండి తప్పించుకోవడానికి చేసిన ప్రయత్నాలు విఫలమయ్యాయి. రాజస్థాన్ నుండి ఉత్తరప్రదేశ్‌లోని బృందావనానికి పారిపోయి, అక్కడ మహిళా వేషంలో, బురఖా ధరించి, లిప్‌స్టిక్ వేసుకుని పోలీసులను మోసం చేయాలని చూసినప్పటికీ చివరకు పట్టుబడ్డాడు.
అసలేం జరిగింది?
రాజస్థాన్‌లోని ధోల్‌పూర్ నివాసి అయిన రాజేంద్ర సిసోడియా (అలియాస్ రాంభరోస్) పోలీస్ కానిస్టేబుల్‌గా పనిచేసేవాడు. గత డిసెంబర్ 15న ఒక 16 ఏళ్ల మైనర్ బాలికపై ఇతను అత్యాచారానికి పాల్పడినట్లు ఆరోపణలు ఉన్నాయి. ఎస్పీ వికాస్ సాంగ్వాన్ తెలిపిన వివరాల ప్రకారం.. ఉద్యోగం ఇప్పిస్తానని నమ్మించి సదరు బాలికను, ఆమె సోదరుడిని రాజేంద్ర తన ఇంటికి పిలిచాడు. అనంతరం తమ్ముడిని సామాగ్రి తేవాలని మార్కెట్‌కు పంపి, ఒంటరిగా ఉన్న బాలికపై అఘాయిత్యానికి పాల్పడ్డాడు.
బాలిక అరుపులు విన్న ఇరుగుపొరుగు వారు రాజేంద్ర ఇంటిని చుట్టుముట్టారు. అయితే, అందరూ చూస్తుండగానే అతను అక్కడి నుండి తప్పించుకున్నాడు. ఈ ఘటన తర్వాత అతడిని విధుల్లో నుండి సస్పెండ్ చేశారు.
పోలీసులను ముప్పుతిప్పలు పెట్టిన నిందితుడు:
అక్కడ నుండి పారిపోయిన రాజేంద్ర, పోలీసులకు దొరకకుండా ఉండటానికి రకరకాల వేషాలు వేశాడు. కొన్నిసార్లు ట్రాక్ సూట్లు, మరికొన్నిసార్లు సూటు-బూటు వేసుకుని వీఐపీలా లేదా ఉన్నతాధికారిలా నటిస్తూ ఆగ్రా, లక్నో, గ్వాలియర్ ప్రాంతాల్లో తిరిగాడు. పోలీసులు అక్కడికి చేరుకునేలోపే చాకచక్యంగా పారిపోయేవాడు.
చివరకు బృందావనంలో అరెస్ట్:
ఎట్టకేలకు బృందావనంలో పోలీసులు అతడిని అదుపులోకి తీసుకున్నారు. పట్టుబడిన సమయంలో అతను బురఖా ధరించి, తలకు హిజాబ్ కట్టుకుని, పెదవులకు లిప్‌స్టిక్ వేసుకుని ఒక మహిళలా కనిపిస్తున్నాడు. నిందితుడిపై పోక్సో (POCSO) చట్టం కింద మరియు ఇతర మహిళలను వేధించిన ఆరోపణలపై కేసులు నమోదు చేశారు.