మధ్యప్రదేశ్ రాష్ట్రం గ్వాలియర్‌లో ఆటో స్పేర్ పార్ట్స్ వ్యాపారిని అశ్లీల వీడియోతో బెదిరించి, 12 లక్షల రూపాయల విలువైన బంగారు నగలను కాజేసిన కాంగ్రెస్ మహిళా నేతతో సహా ఆమె కుటుంబ సభ్యులు నలుగురిని పోలీసులు అరెస్ట్ చేశారు.
అసలేం జరిగిందంటే? రాజస్థాన్ రాష్ట్రం కోటాకు చెందిన భరత్ భూతానీ ఆటో స్పేర్ పార్ట్స్ వ్యాపారం చేయడంతో పాటు రామలీలా కళా ప్రదర్శనల్లో కూడా పాల్గొంటుంటారు. గ్వాలియర్‌కు చెందిన కాంగ్రెస్ నేత రీతా ఆర్యతో ఈయనకు ఇండోర్‌లో పరిచయం ఏర్పడింది. ఈ పరిచయాన్ని అడ్డం పెట్టుకుని రీతా ఆర్య వ్యాపారవేత్త భరత్‌ను గ్వాలియర్‌లోని తన ఇంటికి ఆహ్వానించింది. గత శుక్రవారం భరత్ ఆమె ఇంటికి వెళ్లినప్పుడు అతనికి సాదర స్వాగతం లభించింది.
పథకం ప్రకారం వీడియో తీసి బెదిరింపులు: ఒక గదిలో రీతాతో భరత్ ఉన్న సమయంలో, అప్పటికే వంటగదిలో ముసుగులు ధరించి దాక్కున్న రీతా భర్త రాజేంద్ర బుందేలా, అల్లుడు విశాల్ ఆర్య ఒక్కసారిగా గదిలోకి ప్రవేశించారు. వారు భరత్ మరియు రీతా ఆర్యలను అశ్లీలంగా వీడియో తీశారు. “ఈ వీడియోను సోషల్ మీడియాలో పెట్టి నీ పరువు తీస్తాం” అని భరత్‌ను బెదిరించి, ఆయన ధరించిన బంగారు గొలుసులు, ఉంగరాలు కలిపి మొత్తం రూ. 12 లక్షల విలువైన నగలను లాక్కున్నారు.
పోలీసుల వేట – నలుగురు అరెస్ట్: నిందితుల నుండి తప్పించుకున్న భరత్ భూతానీ వెంటనే సమీపంలోని పోలీస్ స్టేషన్‌లో ఫిర్యాదు చేశారు. కేసు నమోదు చేసిన పోలీసులు ఆ ప్రాంతంలోని సిసిటివి (CCTV) దృశ్యాలను పరిశీలించారు. అందులో దోపిడీ జరిగిన తర్వాత రీతా ఆర్య మరియు ఆమె కుమార్తె నిధి ఆర్య అనుమానాస్పదంగా తిరుగుతున్నట్లు తేలింది.
పోలీసుల విచారణలో రీతా ఆర్య తన భర్త, కుమార్తె మరియు అల్లుడితో కలిసి పక్కా ప్లాన్ ప్రకారం ఈ ‘హనీట్రాప్’కు పాల్పడినట్లు వెల్లడైంది. దీంతో నిందితులు రీతా ఆర్య (కాంగ్రెస్ నేత), రాజేంద్ర బుందేలా (భర్త), నిధి ఆర్య (కుమార్తె), విశాల్ ఆర్య (అల్లుడు)లను పోలీసులు అరెస్ట్ చేసి, వారి నుండి దొంగిలించిన నగలను స్వాధీనం చేసుకున్నారు.