బ్రెజిల్‌కు చెందిన 39 ఏళ్ల మెయిరివోన్ రోచా మోరెస్ తన వింత ప్రవర్తనతో ప్రపంచవ్యాప్తంగా వార్తల్లో నిలిచింది. ఆమె ‘మార్సెలో’ అనే మనిషి ఎత్తున్న బట్టల బొమ్మను తన భర్తగా భావించి పెళ్లి చేసుకుంది. వీరిద్దరి సంసారం సోషల్ మీడియాలో మిలియన్ల మందిని ఆకర్షిస్తోంది.
ముగ్గురు నుండి నలుగురు ‘పిల్లలు’: మెయిరివోన్ ఇప్పటికే మార్సెలిన్ అనే కుమారుడికి, మార్సెలా మరియు ఎమిలియా అనే కవల కుమార్తెలకు తల్లిగా చెప్పుకుంటోంది. అయితే వీరంతా బట్టలతో చేసిన బొమ్మలే కావడం గమనార్హం. డిసెంబర్ ఆరంభంలో తాను నాలుగో సారి గర్భం దాల్చానని ప్రకటించిన ఆమె, డిసెంబర్ 22న తన కొత్త “కొడుకు” రోబ్సు మార్సెలిన్ పుట్టినట్లు ప్రకటించింది.
టాయిలెట్‌లో ప్రసవం: మెయిరివోన్ కథనం ప్రకారం.. ఆ రోజు ఉదయం ఆమెకు నొప్పులు మొదలయ్యాయి. ఆసుపత్రికి వెళ్లడానికి తన బొమ్మ భర్తను కారు పిలవమని చెప్పి, ఈలోపు టాయిలెట్‌కు వెళ్ళింది. టాయిలెట్ సీటుపై కూర్చున్న వెంటనే ఆమెకు ప్రసవం జరిగిందని, బిడ్డ నేరుగా టాయిలెట్‌లో పడ్డాడని ఆమె క్లెయిమ్ చేస్తోంది. వెంటనే బిడ్డను బయటకు తీసి, తన భర్త మార్సెలో ఒడిలో పెట్టినట్లు వీడియోలు షేర్ చేసింది.
నిజం ఏంటి? ఆమె నాలుగో కొడుకు 45 సెంటీమీటర్ల పొడవు, 800 గ్రాముల బరువు ఉన్నాడని మెయిరివోన్ చెబుతోంది. అయితే సోషల్ మీడియాలో దీనిపై పెద్ద చర్చ జరుగుతోంది. ఇది కేవలం పబ్లిసిటీ కోసం చేస్తున్న డ్రామా అని కొందరు అంటుంటే, ఆమె మానసిక స్థితి సరిగా లేదని మరికొందరు అభిప్రాయపడుతున్నారు. కానీ మెయిరివోన్ మాత్రం తన వింత కుటుంబంతో ఎంతో సంతోషంగా ఉన్నానని చెబుతోంది.