బెంగళూరులోని అమెజాన్ కార్యాలయం 3వ నంబర్ గేటు వెలుపల ఫుట్‌పాత్‌పై అమర్చిన భారీ విద్యుత్ ట్రాన్స్‌ఫార్మర్ హఠాత్తుగా పేలిపోవడంతో నడుచుకుంటూ వెళ్తున్న ఓ వ్యక్తి గాయపడ్డాడు.
అక్టోబర్ 7 బుధవారం ఉదయం 9:49 గంటల ప్రాంతంలో చోటుచేసుకున్న ఈ భయానక సంఘటన దృశ్యాలు ప్రస్తుతం సోషల్ మీడియాలో వైరల్ అవుతున్నాయి.
వీడియో ప్రకారం.. మహ్మద్ అఫ్రోజ్ అనే వ్యక్తి మరొకరితో కలిసి ఫుట్‌పాత్‌పై నడుచుకుంటూ వెళ్తుండగా ఏమాత్రం ఊహించని విధంగా ట్రాన్స్‌ఫార్మర్ ఒక్కసారిగా పేలిపోయింది. ఆ పేలుడు ధాటికి అఫ్రోజ్ గాల్లోకి ఎగిరి పక్కనే ఉన్న రోడ్డుపై పడిపోయాడు. అదృష్టవశాత్తూ పెను ప్రమాదం తప్పడంతో, అతను స్వల్ప గాయాలతో ప్రాణాలతో బయటపడ్డాడు.
సమాచారం అందుకున్న పోలీసులు గాయపడిన అఫ్రోజ్‌ను వెంటనే సమీప ఆసుపత్రికి తరలించారు. ప్రస్తుతం అతను క్షేమంగా చికిత్స పొందుతున్నట్లు బెంగళూరు నార్త్ ఈస్ట్ విభాగం డీసీపీ (DCP) మిథున్ కుమార్ ధ్రువీకరించారు. ఆ సమయంలో అటుగా వెళ్తున్న ఓ కారు డాష్‌క్యామ్‌లోనూ ఈ ప్రమాద దృశ్యాలు రికార్డయ్యాయి.
యెలహంక పాత బస్తీ పోలీస్ స్టేషన్ పరిధిలో జరిగిన ఈ ప్రమాదంపై పోలీసులు కేసు నమోదు చేసి సమగ్ర దర్యాప్తు చేపట్టారు. ట్రాన్స్‌ఫార్మర్‌లో తలెత్తిన ఆకస్మిక విద్యుత్ లోపమే (ఎలక్ట్రికల్ ఫాల్ట్) ఈ పేలుడుకు కారణమని ప్రాథమిక విచారణలో తేలింది.
మరో ఘటనలో, మహారాష్ట్రలోని హింగోలిలో ఉన్న బాణసంచా గోదాములో అకస్మాత్తుగా చెలరేగిన అగ్నిప్రమాదంలో ఇద్దరు మృతి చెందగా, 12 మంది గాయపడ్డారు. నివాస ప్రాంతంలో అక్రమంగా నిల్వ ఉంచిన బాణసంచా వల్లే ఈ దుర్ఘటన జరిగినట్లు భావిస్తున్నారు. తీవ్రంగా గాయపడిన క్షతగాత్రులను మెరుగైన చికిత్స నిమిత్తం నాందేడ్ ఆసుపత్రికి తరలించారు.