ముంబై: భర్తను విడిచిపెట్టి అమెరికాలో నివసిస్తూ ఐటీ రంగంలో పనిచేస్తున్న మహిళ నెలకు రూ.8 లక్షలు సంపాదిస్తోంది.
ఈమె తన భర్త నుంచి భరణం ఖర్చుల కోసం నెలకు రూ.1 లక్ష కోరింది. ఆ సమయంలో భర్త కంటే ఎక్కువ సంపాదిస్తోందని పేర్కొంటూ కోర్టు ఆమె పిటిషన్ను కొట్టివేసింది.
మహారాష్ట్రకు చెందిన భార్యాభర్తలిద్దరూ ఐటీ రంగంలో పనిచేసేవారు. ఈ దంపతులకు ఇద్దరు పిల్లలు. వీరు నలుగురూ సంతోషంగా జీవించేవారు. ఈ క్రమంలో భార్యాభర్తల మధ్య మనస్పర్థలు వచ్చాయి. ఇద్దరూ విడిపోవాలని నిర్ణయించుకున్నారు.
దీంతో విడాకులు కోరుతూ పుణే కుటుంబ సంక్షేమ కోర్టులో పిటిషన్ దాఖలు చేశారు. ఆ పిటిషన్ను విచారించిన కోర్టు విడాకులు మంజూరు చేస్తూ ఉత్తర్వులు ఇచ్చింది. పెద్ద బాబును భర్త వద్ద, రెండో బాబును భార్య వద్ద పెంచాలని ఆదేశించింది. ఆ మహిళ 2011 నుండి అమెరికాలోనే నివసిస్తోంది. దీంతో ఆమె తన రెండో బాబుతో అమెరికాలో ఉంది. అక్కడ ప్రైవేట్ ఐటీ సంస్థలో నెలకు రూ.8 లక్షల జీతం పొందుతోంది.
ఈ క్రమంలో భర్త నుంచి ఆ మహిళ శాశ్వత భరణం కోరింది. దాన్ని అంగీకరించడానికి కుటుంబ సంక్షేమ కోర్టు నిరాకరించింది. ఈ నేపథ్యంలో భరణానికి సంబంధించి కుటుంబ సంక్షేమ కోర్టు ఉత్తర్వులను సవాలు చేస్తూ ఆ మహిళ ముంబైలోని మహారాష్ట్ర హైకోర్టులో పిటిషన్ దాఖలు చేసింది.
అందులో, “2011 నుండి నేను అమెరికాలో పనిచేస్తున్నాను. ఇక్కడ ఖర్చులు చాలా ఎక్కువగా ఉన్నాయి. ఇక్కడి జీవనశైలికి తగినట్లుగా నేను మారాల్సి వచ్చింది.
దీనికి నా జీతం సరిపోవడం లేదు. కాబట్టి తనకు నెలకు రూ.1 లక్షను భరణంగా విడిపోయిన భర్త నుంచి ఇప్పించాలి. నా భర్తకు పుణేలో చాలా ఆస్తులు ఉన్నాయి” అని పేర్కొంది.
ఈ పిటిషన్ కోర్టులో విచారణకు వచ్చింది. న్యాయమూర్తులు భారతి డాంగ్రే, మంజుషా దేశ్పాండేలతో కూడిన ధర్మాసనం దీనిపై విచారణ జరిపింది.
ఆ సమయంలో ఆ మహిళ మాజీ భర్త తరఫున ఆమె ఆర్థిక పరిస్థితి సహా ఇతర వివరాలను సమర్పించారు. అంతేకాకుండా తనకంటే భార్యే ఎక్కువ సంపాదిస్తోందని, తన పెద్ద కొడుకును, తల్లిదండ్రులను తాను చూసుకోవాల్సి ఉందని తెలిపాడు. పెద్ద కొడుకు విదేశీ చదువుల ఖర్చులను కూడా తానే భరిస్తున్నట్లు చెప్పాడు.
దీనిని అంగీకరించిన కోర్టు, “భరణం కోసం రూ.1 లక్ష అడుగుతున్నారు. అయితే విదేశాల్లో నివసిస్తున్నారనే కారణంతో భరణం కోసం ప్రత్యేకంగా డబ్బు ఇవ్వలేము. అంతేకాకుండా ఆర్థిక విషయాలలో మీరు (మహిళ) స్వతంత్రంగా ఉన్నారు. నిజానికి భరణం అనేది ఉద్యోగం చేయలేని వారికి ఉద్దేశించినది. పైగా పత్రాల ప్రకారం చూస్తే మీ నెల జీతం మీకు సరిపోతుంది. భర్త, మీరు ఇద్దరూ ఐటీ రంగంలోనే ఉన్నారు. మీ రంగంలో AI ప్రభావం పెరుగుతోంది. దీనివల్ల జాబ్ సెక్యూరిటీకి ముప్పు ఏర్పడింది. కాబట్టి భరణం ఇవ్వాలని ఆదేశించలేము. అదే సమయంలో విడిపోయిన భర్త కోర్టు కేసు ఖర్చుల కోసం రూ.25 వేలు చెల్లించాలి” అని పేర్కొంటూ ఆమె పిటిషన్ను కొట్టివేసింది.