ఉత్తరప్రదేశ్ రాష్ట్రం పిలిభిత్ ప్రాంతంలోని కోర్టు ప్రాంగణం ముఖద్వారం వద్ద అనూహ్యంగా తీవ్ర కలకలం రేగింది.
ఓ మహిళ కేసు విచారణ నిమిత్తం తన భర్తతో కలిసి కోర్టుకు వచ్చింది.
ఆ సమయంలో కోర్టు ప్రవేశ ద్వారం వద్ద నిల్చుని ఉన్న ఒక యువకుడిని చూడగానే, ఆ మహిళ ఒక్కసారిగా పరుగెత్తుకుంటూ వెళ్లి అందరి ముందే అతడిని గట్టిగా కౌగిలించుకుంది. అతడు మరెవరో కాదు, సదరు మహిళ ప్రియుడు.
కనురెప్పపాటు కాలంలో చోటుచేసుకున్న ఈ పరిణామంతో అక్కడే ఉన్న భర్తతో పాటు మిగతా జనం బిత్తరపోయారు. వెంటనే భర్త తరఫు బంధువులు ఆ మహిళను లాగి, ప్రియుడి నుంచి వేరు చేయడానికి తీవ్రంగా ప్రయత్నించారు. అయితే ఆ మహిళ మాత్రం ప్రియుడిని విడిచిపెట్టేందుకు ఏమాత్రం ఒప్పుకోకుండా పట్టుబట్టడంతో ఇరువర్గాల మధ్య తీవ్ర వాగ్వాదం, తోపులాట జరిగాయి.
అక్కడ ఉన్నవారంతా ఈ సంఘటనను విస్తుపోయి చూడటమే కాకుండా తమ మొబైల్ ఫోన్లలో వీడియోలు తీయడం మొదలుపెట్టారు. సమాచారం అందుకుని ఘటనా స్థలానికి చేరుకున్న పోలీసులు ఇరువర్గాలను శాంతింపజేసేందుకు ప్రయత్నించారు. అయినప్పటికీ, చివరకు ఆ మహిళ తన భర్తను వదిలేసి ప్రియుడి వెంటే అక్కడి నుంచి వెళ్లిపోయింది.
కోర్టు ప్రాంగణం వద్ద జరిగిన ఈ ఘటన తాలూకు వీడియో ప్రస్తుతం సోషల్ మీడియాలో పోస్ట్ కావడంతో నెట్టింట విపరీతంగా చక్కర్లు కొడుతోంది. ఈ ఉదంతంపై పోలీసులు కేసు నమోదు చేసి సమగ్ర విచారణ జరుపుతున్నారు.