కేరళ, కాసరగోడ్: భర్త కుటుంబ సభ్యుల ముందే యాసిడ్ తాగి ఒక యువతి ప్రాణాలు విడిచింది. కాసరగోడ్ పాణత్తలకు చెందిన 24 ఏళ్ల ఫాతిమత్ సుఫైద అనే యువతి మరణించింది.
సుఫైద మరణంపై ఆమె కుటుంబ సభ్యులు భర్త ఇంటి వారిపై తీవ్ర ఆరోపణలు చేస్తున్నారు. వీరికి రెండు నెలల బాబు ఉన్నాడు. సోమవారం వారి వివాహ వార్షికోత్సవం జరుపుకోవాల్సి ఉండగా, అంతలోనే ఈ విషాద ఘటన చోటుచేసుకుంది. అదనపు కట్నం (బంగారం) కోసం అత్తారింటి వారు ఆమెను నిరంతరం వేధించేవారని, ఆ వేధింపుల వల్లే సుఫైద ఆత్మహత్య చేసుకుందని వారు ఆరోపిస్తున్నారు. ఈ మేరకు విద్యానగర్ పోలీసులకు ఫిర్యాదు చేయగా, భర్త ఆదిల్ను పోలీసులు అదుపులోకి తీసుకున్నారు. అతడిని విచారిస్తున్నారు.
నిన్న సాయంత్రం సుఫైదను తీసుకెళ్లేందుకు ఆమె తల్లిదండ్రులు ఇంటికి వచ్చారు. ఈ విషయంలో భర్త ఇంట్లో గొడవ జరిగింది. ఒకవేళ పుట్టింటికి వెళ్తే తిరిగి రావద్దని భర్త ఆమెను బెదిరించాడని సమాచారం. ఆ వెంటనే, ఇంట్లో ఉన్న యాసిడ్ను సుఫైద తాగేసింది. ఆమె ప్రాణాపాయ స్థితిలో ఉన్నా, హాస్పిటల్కు తరలించకుండా భర్త కుటుంబ సభ్యులు పట్టించుకోకుండా చూస్తూ ఉండిపోయారని బంధువులు ఆరోపిస్తున్నారు. బంగారపు నగలు విషయమై గతంలో గొడవ జరిగినప్పుడు ఆమె ఫోన్ను భర్త పగలగొట్టాడని, వేధింపుల విషయం బయటకు తెలియకుండా ఉండేందుకే అలా చేశారని కూడా ఆరోపణలు ఉన్నాయి. మృతదేహం ప్రస్తుతం కాసరగోడ్ మిమ్స్ ఆసుపత్రిలో ఉంది. ఆర్డిఓ ఆధ్వర్యంలో విచారణ కొనసాగుతోంది.