బీహార్: దర్భంగా జిల్లాలోని సింహ్వాడ పోలీస్ స్టేషన్ పరిధిలో ఒక షాకింగ్ ఘటన వెలుగుచూసింది. వివాహమై 17 రోజులు మాత్రమే గడిచిన ఒక నవవధువు, తన భర్తను మోసం చేసి ప్రియుడితో పారిపోయింది. వెళ్లేటప్పుడు ఇంట్లో ఉన్న విలువైన బంగారు ఆభరణాలు, రూ. 45 వేల నగదును కూడా ఆమె తీసుకెళ్లిపోయింది. ఈ ఘటనపై బాధితుడు సూరజ్ కుమార్ తండ్రి బ్రిజ్ చౌపాల్ పోలీసులకు ఫిర్యాదు చేశారు.
ఏం జరిగింది? సూరజ్ కుమార్కు, మధుబని జిల్లా పతౌనా గ్రామానికి చెందిన అంజలితో మే 13న వివాహం జరిగింది. వివాహానంతరం అంతా సజావుగానే సాగుతోంది. అయితే, మే 28వ తేదీ రాత్రి భర్తతో కలిసి ఒకే గదిలో నిద్రించిన అంజలి, అర్ధరాత్రి భర్త గాఢనిద్రలో ఉండగా నగలు, నగదు తీసుకుని బయటకు వెళ్లిపోయింది. నిద్రలేచిన సూరజ్, భార్య కనిపించకపోవడంతో ఆందోళన చెంది కుటుంబ సభ్యులకు సమాచారం అందించాడు. విచారణలో ఆమె తన పాత ప్రియుడు చంద్రకిషోర్ చౌపాల్ వద్దకు పారిపోయినట్లు తెలిసింది.
ముందే పెళ్లి ఫిక్స్ అయ్యిందా? సూరజ్ కుమార్ అమ్మమ్మ తెలిపిన వివరాల ప్రకారం, అంజలికి అంతకుముందే చంద్రకిషోర్ చౌపాల్తో వివాహం నిశ్చయమైంది. అయితే, కొన్ని కారణాల వల్ల ఆ సంబంధం విచ్ఛిన్నమైంది. ఆ తర్వాతే సూరజ్తో ఆమె వివాహం జరిగింది. పెళ్లయిన తర్వాత కూడా అంజలి తన పాత ప్రియుడితో ఫోన్లో సంప్రదింపులు జరుపుతూనే ఉందని, అతని మాటలు నమ్మి ఇప్పుడు ఈ నిర్ణయం తీసుకుందని కుటుంబ సభ్యులు ఆరోపిస్తున్నారు.
పోలీసుల దర్యాప్తు: ఈ ఘటనతో సూరజ్ కుటుంబం తీవ్ర ఆవేదనలో ఉంది. సింహ్వాడ పోలీస్ స్టేషన్ ఎస్హెచ్ఓ బసంత కుమార్ ఝా మాట్లాడుతూ, బాధితుల నుంచి ఫిర్యాదు అందుకున్నామని, ప్రస్తుతం ఈ వ్యవహారంపై విచారణ కొనసాగుతోందని తెలిపారు. ఈ ఘటనతో చుట్టుపక్కల గ్రామాలు ఒక్కసారిగా ఉలిక్కిపడ్డాయి.