“భర్త వివాహేతర సంబంధం భార్యను వేధించినట్లు కాదు” – బిడ్డతో సహా మహిళ ఆత్మహత్య కేసులో హైకోర్టు సంచలన తీర్పు..!!

భర్తకు వేరొక మహిళతో వివాహేతర సంబంధం ఉందన్న మనస్తాపంతో, ఓ మహిళ తన బిడ్డతో సహా ప్రాణాలు తీసుకున్న విషాద ఘటన తీవ్ర కలకలం రేపింది.

ఈ ఘటనలో తన చెల్లెలి మరణానికి భర్తే కారణమని (ఆత్మహత్యకు ప్రేరేపించాడని) ఆమె సోదరుడు కేసు నమోదు చేయగా, ఆరోపణలు సరైన రీతిలో రుజువు కాలేదని పేర్కొంటూ దిగువ న్యాయస్థానం ఆ వ్యక్తిని నిర్దోషిగా విడుదల చేసింది.

దీన్ని సవాలు చేస్తూ దాఖలైన అప్పీల్ పిటిషన్‌ను చెన్నై హైకోర్టు తాజాగా కొట్టివేస్తూ తీర్పునిచ్చింది. కేసును విచారించిన హైకోర్టు.. భారత శిక్షాస్మృతి (IPC) సెక్షన్ 498A ప్రకారం, భర్తకు మరొక మహిళతో సంబంధం ఉండటం మాత్రమే చట్టపరంగా భార్యపై జరిగిన హింస లేదా క్రూరత్వంగా పరిగణించలేమని స్పష్టం చేసింది.

భర్త అనుచిత ప్రవర్తనను మాత్రమే ప్రాతిపదికగా తీసుకుని, అతను భార్యను ఆత్మహత్యకు ప్రేరేపించాడనే ఆరోపణను పూర్తిగా ఆమోదించలేమని న్యాయస్థానం తేల్చిచెప్పింది. భర్త వివాహేతర సంబంధం తీవ్ర మనోవేదనను కలిగించినప్పటికీ, అది ఆత్మహత్యకు ప్రత్యక్ష ప్రేరణగా మారదని హైకోర్టు ఇచ్చిన ఈ కీలక తీర్పు, ప్రస్తుత న్యాయ మరియు సామాజిక వర్గాల్లో తీవ్ర చర్చనీయాంశంగా మారింది.