ప్రస్తుత ప్రపంచ క్రికెట్లో జాకబ్ బెథెల్ అత్యంత ఆశాజనకమైన ప్రతిభావంతులలో ఒకరు. ఇంగ్లాండ్ తరపున అన్ని ఫార్మాట్లలో సెంచరీ సాధించిన అత్యంత పిన్న వయస్కుడైన ఆటగాడిగా ఈ 22 ఏళ్ల యువకుడు రికార్డు సృష్టించాడు. ఇప్పటికే విదేశీ గడ్డపై జరిగిన యాషెస్ సిరీస్ మరియు టీ20 ప్రపంచకప్ సెమీఫైనల్లో సెంచరీలు బాది అందరి దృష్టిని ఆకర్షించాడు.
అయితే, ఇంతటి ప్రతిభావంతుడైన బెథెల్ ఇండియన్ ప్రీమియర్ లీగ్ (IPL) 2026లో మాత్రం బెంచ్కే పరిమితమవుతున్నాడు. 2024లో రాయల్ ఛాలెంజర్స్ బెంగళూరు (RCB) బెథెల్ను సుమారు ₹2.60 కోట్లకు కొనుగోలు చేసింది. అతను 2025 ఐపీఎల్లో రెండు మ్యాచ్లు ఆడి, అరంగేట్రం చేసిన మ్యాచ్లోనే హాఫ్ సెంచరీ సాధించాడు. అయినప్పటికీ, అప్పటి నుండి అతనికి ప్లేయింగ్ ఎలెవన్లో చోటు దక్కడం లేదు. ఆర్సీబీ అతని స్థానంలో మరో ఇంగ్లీష్ ప్లేయర్ ఫిల్ సాల్ట్కు అవకాశం ఇస్తోంది. టీమ్ డేవిడ్, రొమారియో షెపర్డ్ మరియు జోష్ హాజిల్వుడ్ జట్టులో ఉన్న ఇతర విదేశీ ఆటగాళ్లు.
గత నెల రోజులుగా జాకబ్ బెథెల్ బెంచ్పైనే కూర్చున్నాడు. ఇదే సమయంలో ఇంగ్లాండ్లో కౌంటీ ఛాంపియన్షిప్ ప్రారంభమైంది. అతని జట్టు వార్విక్షైర్ ఇప్పటికే 3 మ్యాచ్లు ఆడి డివిజన్ వన్లో రెండో స్థానంలో ఉంది. కానీ, బెథెల్ అటు ఇంగ్లాండ్లోనూ ఆడలేక, ఇటు భారతదేశంలోనూ అవకాశం దక్కక సమయాన్ని వృథా చేసుకుంటున్నాడు.
ఇంగ్లాండ్ మాజీ టెస్ట్ కెప్టెన్ అలిస్టర్ కుక్ దీనిపై స్పందిస్తూ.. బెథెల్ ఐపీఎల్లో ఆడటంలో తనకు ఎలాంటి అభ్యంతరం లేదని, కానీ అతను కేవలం బెంచ్ మీద కూర్చోవడంపై అసంతృప్తి వ్యక్తం చేశాడు. ఈ సమయంలో అతను వార్విక్షైర్ తరపున ఆడి ఉంటే, తన రెడ్-బాల్ (టెస్ట్) క్రికెట్ను మరింత మెరుగుపరుచుకునే అవకాశం ఉండేదని కుక్ అభిప్రాయపడ్డారు.