ప్రపంచవ్యాప్తంగా అంటువ్యాధులు ఎప్పుడూ ఆందోళన కలిగించే అంశాలే. అవి ఏ దేశంలో పుట్టినా, సంపర్కం ద్వారా ప్రపంచమంతటా వ్యాపించే సామర్థ్యం వాటికి ఉంటుంది. దీనికి కోవిడ్ ఒక నిదర్శనం. తాజాగా భారత్ పొరుగు దేశమైన బంగ్లాదేశ్‌లో మరో వ్యాధి తీవ్రరూపం దాల్చుతోంది. మీజిల్స్ (Measles) లేదా అంచాం పని బంగ్లాదేశ్‌లో వేగంగా వ్యాపిస్తోంది. తాజా గణాంకాల ప్రకారం, 98 మంది పిల్లలతో సహా మొత్తం 100 మంది ఈ వ్యాధి బారిన పడి మరణించారు. దీంతో భారత్‌లోనూ ఆందోళన మొదలైంది.
గడిచిన మూడు వారాల్లో వేలాది మంది మీజిల్స్ బారిన పడి ఆసుపత్రుల్లో చేరుతున్నారు. పరిస్థితి విషమించడంతో ఆదివారం నుంచి అక్కడ అత్యవసర వ్యాక్సినేషన్ క్యాంపెయిన్ ప్రారంభమైంది.
అంచాం పని (మీజిల్స్) అంటే ఏమిటి? ప్రపంచ ఆరోగ్య సంస్థ (WHO) ప్రకారం, ఇది ప్రపంచంలోనే అత్యంత ప్రమాదకరమైన అంటువ్యాధులలో ఒకటి. వ్యాధిగ్రస్తులు దగ్గినప్పుడు లేదా తుమ్మినప్పుడు ఇది వ్యాపిస్తుంది. ఏ వయసు వారికైనా సోకవచ్చు కానీ, పిల్లల్లో దీని ప్రభావం ఎక్కువగా ఉంటుంది. దీనివల్ల మెదడు వాపు, తీవ్రమైన శ్వాసకోశ సమస్యలు తలెత్తవచ్చు. తీవ్రమైన జ్వరం, తలనొప్పి, కళ్లు ఎర్రబడటం, కళ్ల నుంచి నీరు కారడం, దగ్గు, తుమ్ములు దీని ప్రధాన లక్షణాలు.
ప్రపంచవ్యాప్తంగా ప్రతి ఏటా దాదాపు 95,000 మంది మీజిల్స్ వల్ల మరణిస్తున్నారు. ముఖ్యంగా ఐదేళ్ల లోపు ఉండి, వ్యాక్సిన్ వేయించుకోని పిల్లలకు ఇది ప్రాణాంతకం. జనాభాలో కనీసం 95 శాతం మంది వ్యాక్సిన్ వేయించుకుంటేనే ఈ వ్యాధి వ్యాప్తిని అరికట్టవచ్చు.
బంగ్లాదేశ్‌లో పరిస్థితి: బీబీసీ నివేదిక ప్రకారం, మార్చి 15 నుంచి బంగ్లాదేశ్‌లో 7,500 కేసులు నమోదయ్యాయి. గతేడాది కేవలం 125 కేసులు మాత్రమే నమోదు కావడం గమనార్హం. ఆసుపత్రుల్లో బెడ్లు సరిపోక రోగులు నేలపై పడుకుని చికిత్స పొందుతున్నారు.
భారత్‌కు ముప్పు ఉందా? నిపుణుల అభిప్రాయం ప్రకారం, భారత్‌లో కూడా మీజిల్స్ సవాలు విసురుతోంది. 2025 ఏప్రిల్ నుంచి అక్టోబర్ వరకు ఉన్న కాలంలో మీజిల్స్ సోకే అవకాశం ఉన్న మొదటి పది దేశాల్లో భారత్ ఒకటిగా WHO పేర్కొంది. అయితే భారత్‌లో ముందుగానే నివారణ చర్యలు మొదలయ్యాయి. మన దేశంలో మీజిల్స్-రుబెల్లా (MR) వ్యాక్సిన్ రెండు డోసులను ఉచితంగా అందిస్తున్నారు. అయినప్పటికీ, బంగ్లాదేశ్ వలె భారత్‌లోనూ జనాభా సాంద్రత ఎక్కువ కావడం, ముఖ్యంగా గ్రామీణ ప్రాంతాల్లో వ్యాప్తి చెందే అవకాశం ఉండటంతో ప్రజలందరూ అప్రమత్తంగా ఉండటం అవసరం.