రష్యా నుండి చమురును కొనుగోలు చేయవద్దని భారత్‌పై అమెరికా నిరంతరం ఒత్తిడి చేస్తోంది. రష్యా నుండి చమురు కొనుగోలు చేస్తున్నందుకు ప్రతిగా, భారత్ నుండి వచ్చే వస్తువులపై అమెరికా 50 శాతం సుంకం (Tariff) విధిస్తున్నట్లు గత ఆగస్టులో ట్రంప్ ప్రకటించారు. దీనితో పాటు, H-1B వీసా రుసుములను పెంచడం ద్వారా భారతీయులకు ఇప్పటికే పెద్ద నష్టం కలిగింది.
తాజాగా, అమెరికాలోని ఫ్లోరిడా రాష్ట్రం ఒక సంచలన నిర్ణయం తీసుకోబోతోంది. అక్కడ H-1B వీసా ఉన్నవారికి ఏడాది పాటు ఉద్యోగాలు ఇవ్వకూడదని ప్రతిపాదించింది. స్థానిక అమెరికన్లకు ఉపాధి అవకాశాలు పెంచడమే దీని ఉద్దేశ్యం. జనవరి 29న ఫ్లోరిడా అడ్మినిస్ట్రేటివ్ బోర్డు ఈ ప్రతిపాదనను ఆమోదించే అవకాశం ఉంది. అమెరికాలో H-1B వీసా పొందిన వారిలో అత్యధికులు భారతీయులే కాబట్టి, ఈ నిర్ణయం అమలైతే భారతీయ ఐటీ నిపుణులకు ఇది కోలుకోలేని దెబ్బ అవుతుంది.