ముంబై: ముంబై నగరానికి బిస్కట్ సువాసనను పరిచయం చేసిన విలే పార్లేలోని మొట్టమొదటి పార్లే ఫ్యాక్టరీ ఇప్పుడు చరిత్ర పుటల్లో కలవనుంది. 5.44 ఎకరాల విస్తీర్ణంలో ఉన్న ఈ ఫ్యాక్టరీ సముదాయాన్ని కూల్చివేసి, అక్కడ భారీ వ్యాపార కేంద్రాన్ని నిర్మించబోతున్నారు. 2016లోనే ఇక్కడ ఉత్పత్తి నిలిచిపోయినప్పటికీ, ఆ భవనం ముంబైకి ఒక గుర్తుగా ఉండేది.
పార్లే-జి పుట్టుక – ఒక స్వదేశీ పోరాటం: ఒకప్పుడు బిస్కట్లు అంటే కేవలం బ్రిటిష్ వారు, ధనవంతులు మాత్రమే తినే విలాసవంతమైన వస్తువు. భారతీయులకు బిస్కట్లు ఇవ్వడాన్ని బ్రిటిష్ వారు అవమానంగా భావించేవారు. ఈ వివక్షను చూసి చలించిన మోహన్ లాల్ దయాల్ చౌహాన్ అనే నూలు వ్యాపారి, సామాన్యుడికి కూడా బిస్కట్ రుచిని అందించాలని నిర్ణయించుకున్నారు. అలా 1929లో విలే పార్లేలో ఈ ఫ్యాక్టరీ ప్రారంభమైంది.
బ్రిటిష్ సైనికులకు ఆకలి తీర్చిన భారతీయ బిస్కట్: రెండో ప్రపంచ యుద్ధ కాలంలో బ్రిటిష్ సైనికులకు ఆహార కొరత ఏర్పడినప్పుడు, అదే బ్రిటిష్ ప్రభుత్వం తమ సైనికుల ఆకలి తీర్చడానికి భారతీయుల సొంత బ్రాండ్ అయిన ‘పార్లే గ్లూకో’ బిస్కట్లపైనే ఆధారపడాల్సి వచ్చింది. 1947లో దేశానికి స్వాతంత్ర్యం వచ్చిన తర్వాత బ్రిటిష్ బ్రాండ్లకు గట్టి పోటీనిస్తూ పార్లే మార్కెట్‌ను కైవసం చేసుకుంది.
మలుపు తిప్పిన ‘శక్తిమాన్’: 1980లో ‘గ్లూకో’ పేరును ‘పార్లే-జి’గా మార్చారు. ఇక్కడ ‘G’ అంటే ‘Genius’ అని అర్థం. 90వ దశకంలో ముఖేష్ ఖన్నా నటించిన ‘శక్తిమాన్’ ప్రకటనతో ఈ బిస్కట్ అమ్మకాలు ఒక్కసారిగా 50 టన్నుల నుండి 2000 టన్నులకు పెరిగాయి. 2011 నాటికి ప్రపంచంలోనే అత్యధికంగా అమ్ముడవుతున్న బిస్కట్ బ్రాండ్‌గా పార్లే-జి రికార్డు సృష్టించింది.