భారత్‌కు రానున్న బంగ్లాదేశ్ ప్రధానమంత్రి..! “తారిక్ రెహమాన్ భద్రతను మొదట మీరు నిర్ధారించండి” – కేంద్ర ప్రభుత్వానికి వెళ్లిన కొత్త విజ్ఞప్తి.. నేపథ్యం ఇదేనా..?

బంగ్లాదేశ్ ప్రధానమంత్రి తారిక్ రెహమాన్ భారత్‌కు రాకముందే, ఆయనకు “అనుకూలమైన వాతావరణాన్ని” భారత్ కల్పించాలని బంగ్లాదేశ్ కోరింది.

సెప్టెంబర్ 12 మరియు 13 తేదీలలో జరగనున్న బ్రిక్స్ (BRICS) సదస్సులో రెహమాన్ పాల్గొంటారా లేదా అనే దానిపై ఇంకా స్పష్టత లేదు. ఇప్పటికే భారత్, బంగ్లాదేశ్ దేశాల మధ్య సంబంధాలలో కొన్ని భేదాభిప్రాయాలు ఉన్నాయి. ఈ నేపథ్యంలో బంగ్లాదేశ్ చేసిన కొత్త విజ్ఞప్తి ప్రాధాన్యత సంతరించుకుంది.

రెహమాన్ భారత పర్యటనకు అనువైన వాతావరణం కల్పించాలని బంగ్లాదేశ్ విదేశాంగ శాఖ ప్రతినిధి షాహిదుల్ కరీం పేర్కొన్నారు. దీనికి ప్రధాన కారణం మాజీ ప్రధాని షేక్ హసీనాను బంగ్లాదేశ్‌కు అప్పగించాలనే డిమాండ్‌ అని సమాచారం. ఇటీవల భారత హైకమిషనర్ దినేష్ త్రివేదిని తారిక్ రెహమాన్ కలిసినప్పుడు కూడా, హసీనాను స్వదేశానికి పంపే అంశంపై చర్చ జరిగిందని వార్తలు వచ్చాయి. దీనివల్ల రెహమాన్ భారత పర్యటన ఎలా ఉంటుందనే ఆసక్తి నెలకొంది.

ఇంతలో, ఆగస్టు 5న ఢిల్లీలో షేక్ హసీనా మీడియాను ఉద్దేశించి మాట్లాడటం బంగ్లాదేశ్‌లో తీవ్ర వ్యతిరేకతను రేకెత్తించింది. డిసెంబర్‌లో బంగ్లాదేశ్‌కు తిరిగి వెళ్లి ప్రజాస్వామ్యాన్ని పునరుద్ధరిస్తానని హసీనా ప్రకటించారు. ఈ ఘటన బంగ్లాదేశ్ ప్రజల మనోభావాలను దెబ్బతీసిందని ఆ దేశ ప్రభుత్వం పేర్కొంది. అయితే, హసీనా నిర్వహించిన ఆ మీడియా సమావేశంతో భారత ప్రభుత్వానికి ఎటువంటి సంబంధం లేదని, అక్కడ వ్యక్తం చేసిన అభిప్రాయాలను భారత్ సమర్థించడం లేదని భారత విదేశాంగ శాఖ వివరణ ఇచ్చింది.

కాగా, బ్రిక్స్ సదస్సుకు తారిక్ రెహమాన్‌కు వ్యక్తిగతంగా ఆహ్వానం అందలేదని, అది బిమ్స్టెక్ (BIMSTEC) సంస్థ అధ్యక్షుడికి పంపిన ఆహ్వానం అని బంగ్లాదేశ్ విదేశాంగ మంత్రి ఖలీలుర్ రెహమాన్ చెప్పారు. కానీ, బంగ్లాదేశ్ ప్రధానికి ద్వైపాక్షిక పర్యటన కోసం ప్రత్యేక ఆహ్వానం, బ్రిక్స్ సదస్సు ప్రత్యేక సమావేశంలో పాల్గొనేందుకు ఆహ్వానం అందించామని భారత విదేశాంగ శాఖ తెలిపింది. భారత్, బంగ్లాదేశ్ సహా 7 దేశాలతో కూడిన బిమ్స్టెక్ సంస్థకు ప్రస్తుతం బంగ్లాదేశ్ నాయకత్వం వహిస్తోంది. ఈ నేపథ్యంలో తారిక్ రెహమాన్ భారత పర్యటన రెండు దేశాల సంబంధాలలో కీలకమైనదిగా మారింది.