2026 టీ20 ప్రపంచకప్ భారత్లో ఎంతో వైభవంగా ముగిసింది. మొత్తం 20 జట్లు ఈ మెగా టోర్నీలో పాల్గొన్నాయి. అంతర్జాతీయ క్రికెట్ మండలి (ICC) అన్ని ఏర్పాట్లను పక్కాగా నిర్వహించింది. ఫైనల్లో న్యూజీలాండ్పై సూర్యకుమార్ యాదవ్ నేతృత్వంలోని టీమ్ ఇండియా ఘనవిజయం సాధించి ప్రపంచకప్ను ముద్దాడింది. అయితే, టోర్నీ ముగిసిన తర్వాత ఈ ప్రపంచకప్లో ఫిక్సింగ్ జరిగిందనే వార్తలు ప్రకంపనలు సృష్టిస్తున్నాయి. దీనిపై ఐసీసీ విచారణ చేపట్టగా కొన్ని దిగ్భ్రాంతికరమైన విషయాలు వెలుగులోకి వచ్చాయి.
బిష్ణోయ్ గ్యాంగ్ హస్తం? ఐసీసీ విచారణలో కెనడా మరియు న్యూజీలాండ్ మధ్య జరిగిన గ్రూప్ దశ మ్యాచ్లో ఫిక్సింగ్ జరిగిందని, దీని వెనుక ‘లారెన్స్ బిష్ణోయ్’ గ్యాంగ్ ప్రత్యక్ష ప్రమేయం ఉందని ఆరోపణలు వస్తున్నాయి. కెనడా జట్టు కెప్టెన్ దిల్ప్రీత్ బజ్వా ఈ కుంభకోణంలో భాగస్వామి అయ్యి ఉండవచ్చని ఐసీసీ అవినీతి నిరోధక విభాగం (ACU) అనుమానిస్తోంది. గ్రూప్ దశలో ఒక మ్యాచ్లో బజ్వా ప్రదర్శనపై లోతైన విచారణ జరుగుతోంది.
అనుమానాస్పద ఓవర్: న్యూజీలాండ్తో జరిగిన మ్యాచ్లో ఒక ఓవర్ అసాధారణంగా అత్యంత ఖరీదైనదిగా (ఎక్కువ పరుగులు ఇవ్వడం) నిలిచింది. అది ఎవరూ ఊహించని రీతిలో సాగడంతో ‘స్పాట్ ఫిక్సింగ్’ అనుమానాలు బలపడ్డాయి. దీనిపై ఏసీయూ అధికారులు బజ్వాను ప్రశ్నించి, అతని మొబైల్ ఫోన్ను స్వాధీనం చేసుకున్నారు. కెనడాలో నేరపూరిత ముఠాగా పిలువబడే బిష్ణోయ్ గ్రూప్ ఈ కుట్రలో కీలకంగా వ్యవహరించిందని ‘కెనడియన్ బ్రాడ్కాస్టింగ్ కార్పొరేషన్’ (CBC) నివేదించింది.
బెదిరింపులతో కెప్టెన్ పదవి? గతంలో గాయకుడు సిద్ధూ మూసేవాలాను హత్య చేసిన ఈ ముఠానే, బజ్వాను కెనడా జట్టుకు కెప్టెన్ చేయడానికి వెనుక ఉండి నడిపించిందని నివేదికలు చెబుతున్నాయి. 2025 జూలైలో జరిగిన ఒక దేశీయ టోర్నీ సందర్భంగా, బ్రిటిష్ కొలంబియాలోని ఒక రెస్టారెంట్లో కెనడా జాతీయ జట్టు కీలక ఆటగాడిని బిష్ణోయ్ గ్యాంగ్ సభ్యులు బెదిరించినట్లు సమాచారం. “దిల్ప్రీత్ బజ్వాను కెప్టెన్గా చేసేందుకు మద్దతు ఇవ్వకపోతే మీ కుటుంబం తీవ్ర పరిణామాలు ఎదుర్కోవాల్సి వస్తుంది” అని వారు హెచ్చరించారట.
అంతేకాకుండా, క్రికెట్ బోర్డులో మరియు జట్టులో తమకు అనుకూలమైన వ్యక్తులను చేర్చడం ద్వారా బెట్టింగ్ మాఫియాను నడపాలని ఈ గ్యాంగ్ ప్లాన్ చేసినట్లు తెలుస్తోంది. 2026 ప్రపంచకప్కు కొద్ది వారాల ముందే బజ్వాను కెప్టెన్గా నియమించడం ఈ అనుమానాలకు బలం చేకూరుస్తోంది. ప్రస్తుతం ఐసీసీ విచారణ కొనసాగుతోంది, త్వరలోనే మరిన్ని సంచలన నిజాలు బయటకు వచ్చే అవకాశం ఉంది.