భారత్‌లో స్థిరంగా జనాభా రేటు.. కానీ కుటుంబ నియంత్రణ భారం మాత్రం మహిళలదే! ఎన్‌ఎఫ్‌హెచ్‌ఎస్-6 లో సంచలన విషయాలు!

న్యూఢిల్లీ: భారతదేశంలో సంతానోత్పత్తి రేటు స్థిరంగా సాగుతోంది. జాతీయ కుటుంబ ఆరోగ్య సర్వే (NFHS) గత రెండు విడతల గణాంకాల ప్రకారం.. దేశ సగటు మొత్తం సంతానోత్పత్తి రేటు (TFR) 2.0 వద్దే స్థిరంగా కొనసాగుతోంది. ఇది జనాభా పునరుత్పత్తి స్థాయి (Replacement-level fertility) కంటే తక్కువ కావడం గమనార్హం.

అయితే, ఈ డేటాను నిశితంగా పరిశీలిస్తే.. శాశ్వత కుటుంబ నియంత్రణ ఆపరేషన్ల భారం దేశంలో ఇంకా అత్యధికంగా మహిళలపైనే పడుతోందని స్పష్టమవుతోంది. భారతదేశంలో వివాహితులైన మహిళల్లో ఏకంగా 36.5 శాతం మంది కుటుంబ నియంత్రణ ఆపరేషన్లు (ట్యూబెక్టమీ) చేయించుకోగా, పురుషులలో ఈ శాతం కేవలం 0.5 శాతం (వాసెక్టమీ) మాత్రమే ఉందని సర్వే గణాంకాలు చెబుతున్నాయి.

ఎన్‌ఎఫ్‌ఎచ్‌ఎస్-5 తో పోలిస్తే ఎన్‌ఎఫ్‌ఎచ్‌ఎస్-6 నాటికి మహిళల ఆపరేషన్ల శాతం 37.9 శాతం నుండి 36.5 శాతానికి స్వల్పంగా తగ్గింది. అదే సమయంలో పురుషులలో ఈ మార్పు కేవలం 0.2 శాతం మాత్రమే పెరిగి, 0.3 శాతం నుండి 0.5 శాతానికి చేరింది.

అంటే ప్రస్తుతానికి 15-49 ఏళ్ల మధ్య వయసున్న ప్రతి 100 మంది వివాహిత మహిళల్లో సగటున 37 మంది శాశ్వత కుటుంబ నియంత్రణ పద్ధతినే ఎంచుకుంటున్నారు. కానీ పురుషులలో మాత్రం 100 మందికి ఒక్కరు కూడా ఈ ఆపరేషన్ చేయించుకోవడం లేదు. ఫలితంగా, భారతదేశంలో పురుషులతో పోలిస్తే మహిళల ఆపరేషన్లే 73 రెట్లు ఎక్కువగా జరుగుతున్నాయి.

పురుషుల ఆపరేషన్లలో తెలంగాణ టాప్

పురుషుల ఆపరేషన్ల విషయంలో దేశంలోనే అత్యధిక వృద్ధి రేటు తెలంగాణలో నమోదైంది. ఎన్‌ఎఫ్‌ఎచ్‌ఎస్-5 లో 2 శాతంగా ఉన్న పురుషుల ఆపరేషన్ల శాతం, ఎన్‌ఎఫ్‌ఎచ్‌ఎస్-6 నాటికి 3.6 శాతానికి పెరిగింది.

ఈ వృద్ధితో తెలంగాణ రాష్ట్రం గతంలో మొదటి స్థానంలో ఉన్న హిమాచల్ ప్రదేశ్‌ను వెనక్కి నెట్టి అగ్రస్థానానికి చేరుకుంది. హిమాచల్ ప్రదేశ్‌లో ఈ శాతం 3.3 శాతం నుండి 2.3 శాతానికి పడిపోయి రెండో స్థానానికి చేరింది.

అయితే పురుషుల ఆపరేషన్లలో దేశంలోనే నంబర్ వన్‌గా ఉన్న తెలంగాణలో కూడా, పురుషులతో పోలిస్తే మహిళల ఆపరేషన్లే 17 రెట్లు ఎక్కువగా ఉండటం గమనార్హం.

దేశవ్యాప్తంగా కేవలం మరో మూడు రాష్ట్రాల్లో మాత్రమే పురుషుల ఆపరేషన్లు 1 శాతం కంటే ఎక్కువగా ఉన్నాయి. అవి: సిక్కిం (1.8 శాతం), ఛత్తీస్‌గఢ్ (1.4 శాతం), మహారాష్ట్ర (1.1 శాతం).

హర్యానా, మధ్యప్రదేశ్ (చెరో 0.9 శాతం), ఉత్తరాఖండ్, ఆంధ్రప్రదేశ్ (చెరో 0.8 శాతం) రాష్ట్రాలు 1 శాతం మార్కుకు దరిదాపుల్లో ఉన్నాయి.

అత్యంత తక్కువగా మహిళల ఆపరేషన్లు నమోదైన రాష్ట్రాల్లో కూడా ఆ సంఖ్య పురుషుల కంటే గణనీయంగానే ఎక్కువ. అస్సాం, మేఘాలయ రాష్ట్రాల్లో మాత్రమే మహిళల ఆపరేషన్ల శాతం 10 శాతం కంటే తక్కువగా ఉంది.

దక్షిణాది రాష్ట్రాల్లో మహిళలపైనే భారం

దేశంలోనే అత్యధికంగా మహిళల కుటుంబ నియంత్రణ ఆపరేషన్లు నమోదైన మొదటి ఐదు రాష్ట్రాలలో నాలుగు దక్షిణాది రాష్ట్రాలే కావడం గమనార్హం.

ఇందులో ఆంధ్రప్రదేశ్ 69.5 శాతంతో దేశంలోనే అగ్రస్థానంలో ఉండగా.. ఆ తర్వాత స్థానాల్లో తెలంగాణ (62.5 శాతం), కర్ణాటక (57 శాతం), తమిళనాడు (57 శాతం) ఉన్నాయి. కేరళ (42.3 శాతం) కూడా మొదటి పది రాష్ట్రాల జాబితాలో నిలిచింది.

ఈ దక్షిణాది రాష్ట్రాలు పురుషుల ఆపరేషన్ల భాగస్వామ్యం చాలా తక్కువగా ఉన్నప్పటికీ జనాభా స్థిరీకరణను సాధించగలిగాయి. ఈ ఐదు రాష్ట్రాల సంతానోత్పత్తి రేటు (TFR) జాతీయ సగటు కంటే తక్కువగా ఉంది.

• కర్ణాటక – 1.8
• ఆంధ్రప్రదేశ్ – 1.8
• తెలంగాణ – 1.9
• తమిళనాడు – 1.7
• కేరళ – 1.8

తెలంగాణ (3.6 శాతం) మినహా మిగిలిన దక్షిణాది రాష్ట్రాల్లో పురుషుల ఆపరేషన్ల శాతం 1 శాతం లోపే ఉంది.

కర్ణాటక పట్టణ ప్రాంతాల్లో పురుషుల ఆపరేషన్లు సున్నా శాతం కాగా, గ్రామీణ ప్రాంతాల్లో కేవలం 0.1 శాతం మాత్రమే నమోదయ్యాయి.