భారత ఆర్థిక వ్యవస్థ మైలురాయి: కొత్త సంవత్సరంలో కేంద్ర ప్రభుత్వం ప్రకటించిన అతిపెద్ద శుభవార్త!

భారతీయులందరూ గర్వపడేలా మన దేశ ఆర్థిక వ్యవస్థ (Economy) ఇప్పుడు అత్యంత బలోపేతమైంది. శక్తివంతమైన జపాన్‌ను అధిగమించి భారత్ ప్రపంచంలోనే 4వ అతిపెద్ద ఆర్థిక శక్తిగా ఎదిగింది. కేంద్ర ప్రభుత్వ నివేదిక ప్రకారం, గత 10 ఏళ్లలో మన దేశ జీడీపీ (GDP) రెట్టింపు అయ్యి రాకెట్ వేగంతో దూసుకుపోతోంది. ఇదే వేగం కొనసాగితే మరో మూడేళ్లలో జర్మనీని కూడా వెనక్కి నెట్టి 3వ స్థానానికి చేరుకోవడం ఖాయంగా కనిపిస్తోంది.

లెక్కల్లో మనమే టాప్!
ప్రస్తుతం భారత్ మరియు జపాన్ దేశాల ఆర్థిక వ్యవస్థల విలువ సుమారు $4.18 ట్రిలియన్లు. అయితే వృద్ధి రేటులో భారత్ ఎంతో ముందుంది. జపాన్ వృద్ధి రేటు కేవలం 0.6% వద్ద నెమ్మదిగా సాగుతుంటే, భారత్ 2025-26 అంచనాల ప్రకారం 8.2% వేగంతో దూసుకెళ్తోంది. అందుకే IMF (అంతర్జాతీయ ద్రవ్యనిధి) కూడా “భారత్ ముందంజలో ఉంది, జపాన్ వెనుకబడింది” అని అధికారికంగా స్పష్టం చేసింది.

తలసరి ఆదాయంలో జపాన్ ముందంజ
దేశం ఆర్థికంగా ఎదిగినా, సామాన్య ప్రజల ఆదాయం విషయంలో మనం ఇంకా మెరుగుపడాల్సి ఉంది. జపాన్ ప్రజల సగటు వార్షిక ఆదాయం సుమారు 31 లక్షల రూపాయలు ఉంటే, భారతీయుల సగటు ఆదాయం కేవలం 2.63 లక్షల రూపాయలు. అంటే తలసరి ఆదాయం విషయంలో జపాన్ మనకంటే ఎంతో ముందుంది.

యువశక్తి (Young India) vs వృద్ధాప్యం (Aging Japan)
భారతదేశానికి అతిపెద్ద బలం మన యువత. భారతీయుల సగటు వయస్సు 28 ఏళ్లు, అదే జపాన్‌లో సగటు వయస్సు 49 ఏళ్లు. జపాన్ జనాభాలో 29% మంది వృద్ధులే కావడంతో అక్కడ కార్మికుల కొరత ఉంది. కానీ మన దగ్గర పని చేసే గట్టి పిండాలు (యువత) పుష్కలంగా ఉన్నారు. ఇదే మనకు ప్లస్ పాయింట్.

మౌలిక సదుపాయాలు మరియు గతి శక్తి
జపాన్ బుల్లెట్ రైళ్లు, రోడ్లు ప్రపంచ ప్రసిద్ధి. అయితే భారత్ కూడా 1.4 ట్రిలియన్ డాలర్ల ‘గతి శక్తి’ ప్రాజెక్టు ద్వారా రోడ్లు, ఎయిర్‌పోర్టులు, హైవేలను శరవేగంగా అభివృద్ధి చేస్తోంది. ఇన్ఫ్రాస్ట్రక్చర్ విషయంలో భారత్ ఇప్పుడు చాలా యాక్టివ్‌గా ఉంది.

అప్పుల భారం ఎవరికి ఎక్కువ?
ఆర్థిక క్రమశిక్షణ విషయంలో జపాన్ కంటే భారత్ చాలా సురక్షితంగా ఉంది. జపాన్ అప్పులు వారి జీడీపీలో 260% ఉండగా, భారత అప్పులు జీడీపీలో కేవలం 85% మాత్రమే ఉన్నాయి. అంటే ఆర్థికంగా మనం జపాన్ కంటే చాలా దృఢంగా ఉన్నాము.

తదుపరి లక్ష్యం: జర్మనీ! జపాన్ దగ్గర విదేశీ మారక నిల్వలు 107 లక్షల కోట్లు ఉంటే, మన దగ్గర సుమారు 63 లక్షల కోట్లు ఉన్నాయి. అయినప్పటికీ, మన వృద్ధి రేటును బట్టి చూస్తే 2030 నాటికి లేదా రాబోయే మూడు ఏళ్లలోనే జర్మనీని దాటి 3వ స్థానానికి చేరుకోవడం ఖాయం!