టెహ్రాన్: ప్రపంచ దేశాల ముడిచమురు రవాణాకు కీలకమైన హార్ముజ్ జలసంధిలో మళ్లీ ఉద్రిక్తతలు చోటుచేసుకున్నాయి. అక్కడ అకస్మాత్తుగా జరిగిన కాల్పుల ఘటన ఆ ప్రాంతాన్ని యుద్ధ క్షేత్రంగా మార్చేసింది. భారత్లో రిజిస్టర్ అయిన ఒక నౌకతో సహా మొత్తం రెండు నౌకలపై ఇరాన్ దళాలు కాల్పులు జరిపినట్లు సమాచారం అందింది.
గల్ఫ్ రీజియన్లో పరిస్థితులు ఇంకా చక్కబడలేదు. తాత్కాలికంగా కాల్పుల విరమణ అమలులో ఉన్నప్పటికీ, అక్కడక్కడ ఘర్షణలు జరుగుతూనే ఉన్నాయి. దీంతో ఎప్పుడు ఏం జరుగుతుందో, ఎప్పుడు పూర్తిస్థాయి యుద్ధం మొదలవుతుందోనన్న భయాందోళనల మధ్య ప్రపంచ దేశాలన్నీ గల్ఫ్ వైపు నిశితంగా గమనిస్తున్నాయి.
కాల్పుల ఘటన:
ఈ రోజు పరిస్థితులు ఒక్కసారిగా అదుపు తప్పాయి. భారత్కు చెందిన ‘సన్మార్ హెరాల్డ్’ (Sanmar Herald) అనే భారీ సూపర్ ట్యాంకర్తో పాటు మరో నౌకపై ఇరాన్ దళాలు కాల్పులు జరపడం తీవ్ర ఉత్కంఠకు దారితీసింది.
అసలేం జరిగింది?
సుమారు 20 లక్షల బ్యారెళ్ల ఇరాకీ ముడిచమురుతో భారత జెండాతో ప్రయాణిస్తున్న ఆ సూపర్ ట్యాంకర్, హార్ముజ్ జలసంధిని దాటేందుకు ప్రయత్నించింది. ఆ సమయంలో ఇరాన్ విప్లవాత్మక దళాలకు చెందిన రెండు బోట్లు అక్కడికి చేరుకున్నాయి. హెచ్చరికలను బేఖాతరు చేస్తూ భారత నౌక వైపు అవి విచక్షణారహితంగా కాల్పులు జరిపినట్లు సమాచారం. వెంటనే భారత నౌకతో సహా అక్కడ ఉన్న ఇతర వాణిజ్య నౌకలు తమ దిశను మార్చుకుని వేగంగా వెనక్కి తిరిగాయి. అదృష్టవశాత్తూ, భారత నౌకలోని సిబ్బంది అందరూ సురక్షితంగా ఉన్నారని తెలిసింది.
కాల్పులు జరిగిన నౌక సమీపంలోనే మరో భారత నౌక కూడా ఉందని, అయితే దానికి ఎటువంటి నష్టం జరగలేదని సమాచారం. భారత్కు ముడిచమురు మరియు ఎల్పిజి గ్యాస్ రావడానికి హార్ముజ్ ప్రధాన మార్గం కావడంతో, అక్కడ నెలకొన్న ఈ గందరగోళం ఆందోళన కలిగిస్తోంది.
హార్ముజ్ మూసివేత:
హార్ముజ్ జలసంధిని మళ్లీ తెరుస్తున్నట్లు నిన్ననే ఇరాన్ ప్రకటించింది. అయితే, అదే సమయంలో అమెరికా అధ్యక్షుడు డొనాల్డ్ ట్రంప్ స్పందిస్తూ.. “ఇరాన్తో ఒప్పందం కుదిరే వరకు అమెరికా నౌకాదళ దిగ్బంధం కొనసాగుతుంది” అని ప్రకటించారు. దీంతో ఇరాన్ తన నిర్ణయాన్ని మార్చుకుంది (యూ-టర్న్ తీసుకుంది). అమెరికా తన హామీలను ఉల్లంఘించిందని, అందుకే హార్ముజ్ జలసంధిని పూర్తిగా మూసివేస్తున్నామని ఇరాన్ ప్రకటించింది. అనుమతి లేకుండా ఏ దేశ వాణిజ్య నౌక లోపలికి ప్రవేశించడానికి వీల్లేదని స్పష్టం చేసింది. ఈ ప్రకటన వెలువడిన వెంటనే భారత నౌకపై కాల్పులు జరగడం గమనార్హం.
చమురు ధరలపై ప్రభావం:
ప్రపంచ ముడిచమురు అవసరాల్లో 20% ఈ చిన్న మార్గం గుండానే సరఫరా అవుతుంది. ఇక్కడ ఒక్క తుపాకీ గుండు పేలినా, ప్రపంచవ్యాప్తంగా పెట్రోల్ బంకుల్లో ధరలు ఆకాశాన్ని తాకడం ఖాయం. అమెరికా – ఇరాన్ మధ్య జరుగుతున్న ఈ ఆధిపత్య పోరులో భారత్ వంటి దేశాలు అనవసరంగా ఇబ్బందులు పడుతున్నాయి.