న్యూఢిల్లీ: మన దేశంలో యుద్ధ విమానాల కొరత దేశ భద్రతపై ప్రభావం చూపుతోంది. ఈ నేపథ్యంలో, ఫ్రాన్స్ నుండి 114 రాఫెల్ యుద్ధ విమానాలను కొనుగోలు చేయడానికి భారత్ సిద్ధమవుతోంది. దాదాపు రూ. 3.25 లక్షల కోట్ల వ్యయంతో ఈ భారీ ఒప్పందం జరగనున్నట్లు సమాచారం.
ఒక దేశ రక్షణకు సైన్యం, వైమానిక దళం, నావికాదళం అత్యంత ముఖ్యం. ప్రస్తుతం ప్రపంచవ్యాప్తంగా నెలకొన్న ఉద్రిక్తతలు, ముఖ్యంగా పాకిస్థాన్, చైనా మరియు బంగ్లాదేశ్ సరిహద్దుల నుండి వస్తున్న సవాళ్ల దృష్ట్యా వైమానిక దళాన్ని బలోపేతం చేయడం అనివార్యమైంది. ఇటీవల ‘ఆపరేషన్ సిందూర్’ ద్వారా మనం పాకిస్థాన్‌కు గట్టి బుద్ధి చెప్పినప్పటికీ, సరిహద్దుల్లో ఇంకా ముప్పు పొంచి ఉంది.
ప్రస్తుతం భారత వైమానిక దళంలో మొత్తం 42 స్క్వాడ్రన్లు ఉండాల్సి ఉండగా, కేవలం 29 స్క్వాడ్రన్లు మాత్రమే అందుబాటులో ఉన్నాయి. అంటే దాదాపు 13 స్క్వాడ్రన్లకు యుద్ధ విమానాల కొరత ఉంది. ఈ లోటును భర్తీ చేయడానికి ఈ నెల చివరలో భారత్‌కు రానున్న ఫ్రాన్స్ అధ్యక్షుడు ఇమ్మాన్యుయేల్ మాక్రాన్ పర్యటనలో ఈ ఒప్పందంపై సంతకాలు జరిగే అవకాశం ఉంది.
దీనిపై రక్షణ శాఖ మంత్రి రాజ్‌నాథ్ సింగ్ నేతృత్వంలోని డిఫెన్స్ అక్విజిషన్ కౌన్సిల్ (DAC) త్వరలోనే తుది ఆమోదం తెలపనుంది. మొత్తం 114 విమానాలలో:
- 88 రాఫెల్ విమానాలు: సింగిల్ సీటర్ (ఒక్కరు కూర్చునేవి).
- 26 రాఫెల్ విమానాలు: ట్విన్ సీటర్ (ఇద్దరు కూర్చునేవి).
విశేషమేమిటంటే: మొత్తం 114 విమానాలలో కేవలం 18 మాత్రమే ఫ్రాన్స్ నుండి నేరుగా దిగుమతి చేసుకుంటారు. మిగిలిన విమానాలను ‘మేక్ ఇన్ ఇండియా’ పథకం కింద భారతదేశంలోనే తయారు చేస్తారు. వీటిలో 60 శాతం స్వదేశీ పరికరాలనే వాడతారు. దీని కోసం రాఫెల్ తయారీ సంస్థ ‘దస్సాల్ట్ ఏవియేషన్’ మన దేశంలోని ప్రైవేట్ సంస్థలతో జతకట్టనుంది.