హోసకోటె, : వివాహితపై పెంచుకున్న వ్యామోహం ఒక వ్యక్తిని కిరాతకుడిగా మార్చింది. తన ప్రియురాలి భర్త అడ్డు తొలగించుకోవాలని పథకం వేసి, అతడిని దారుణంగా హత్య చేసిన ఘటన బెంగళూరు గ్రామీణ జిల్లా హోసకోటె తాలూకా దబ్బగుంటనహళ్లిలో వెలుగుచూసింది.
దబ్బగుంటనహళ్లికి చెందిన శివశంకర్ అనే యువకుడు పారిశ్రామిక వాడలో పనిచేస్తూ తల్లి, భార్య పవిత్ర మరియు పిల్లలతో కలిసి ప్రశాంతంగా జీవించేవాడు. ఏప్రిల్ 13 సోమవారం రాత్రి, పని ముగించుకుని వచ్చిన శివశంకర్ ఉక్కపోతగా ఉండటంతో గాలి కోసం, అలాగే ఫోన్ మాట్లాడటానికి ఇంటి బయటకు వచ్చాడు. అప్పటికే అదను కోసం వేచి చూస్తున్న నిందితుడు అనిల్ కుమార్, చీకట్లో శివశంకర్ మీద వేటకొడవలితో విచక్షణారహితంగా దాడి చేసి పారిపోయాడు. తెల్లవారుజామున శివశంకర్ తల్లి గౌరమ్మ బయటకు వచ్చి చూసేసరికి, రక్తపు మడుగులో పడి ఉన్న కొడుకు శవాన్ని చూసి గుండె పగిలినంత పనైంది.
హత్యకు కారణం ఏంటి?
శివశంకర్ ఎవరి జోలికి వెళ్లే వ్యక్తి కాకపోవడంతో మొదట పోలీసులకు ఈ హత్య మిస్టరీగా మారింది. అయితే లోతుగా విచారణ జరపగా, శివశంకర్ భార్య పవిత్రకు మరియు అనిల్ కుమార్కు మధ్య ఉన్న వివాహేతర సంబంధం బయటపడింది. గత 4 ఏళ్లుగా వీరిద్దరి మధ్య స్నేహం ఉండేది. అయితే ఇటీవల కుటుంబ సభ్యుల హెచ్చరికలతో పవిత్ర ఈ సంబంధాన్ని తెంచుకోవాలని నిర్ణయించుకుంది. “నన్ను వదిలేయ్, నీ పని నువ్వు చూసుకో, పెళ్లి చేసుకో” అని అనిల్ కు స్పష్టం చేసింది.
పవిత్రను ఎలాగైనా తన సొంతం చేసుకోవాలని పంతం పట్టిన అనిల్, ఆమె భర్త అడ్డుగా ఉన్నాడని భావించాడు. శివశంకర్ చనిపోతే పవిత్ర తన దగ్గరకు వస్తుందని ప్లాన్ వేసి, రాత్రి వేళ మాటు వేసి అతడిని అంతం చేశాడు. హత్య తర్వాత ఏమీ తెలియనట్టు తన ఊర్లో తిరుగుతున్న అనిల్ ను పోలీసులు అరెస్ట్ చేశారు.
పోలీసుల విచారణ:
హోసకోటె పోలీసులు మృతుడి భార్య పవిత్రను కూడా విచారించారు. అయితే కాల్ లిస్ట్ మరియు మెసేజ్ల ఆధారంగా ఈ హత్య కుట్రలో ఆమె పాత్ర లేదని తేలింది. ప్రస్తుతం ప్రధాన నిందితుడు అనిల్ కుమార్ జైలులో ఉండగా, పోలీసులు అన్ని సాక్ష్యాలను సేకరిస్తున్నారు.