నర్మదాపురం (మధ్యప్రదేశ్): మద్యం మహమ్మారిని తరిమికొట్టేందుకు ఒక చిన్న గ్రామం తీసుకున్న నిర్ణయం ఇప్పుడు దేశవ్యాప్తంగా చర్చనీయాంశంగా మారింది. తాగొచ్చి గొడవలు చేయడం, కుటుంబాలను రోడ్డున పడేయడం వంటి ఘటనలకు చెక్ పెట్టేందుకు మధ్యప్రదేశ్‌లోని నర్మదాపురం జిల్లా ‘డొంగర్‌వాడ’ గ్రామ పంచాయతీ ఒక చారిత్రాత్మక తీర్మానాన్ని ఆమోదించింది. “తాగితే సర్కారీ ఫలాలు బంద్” అంటూ మందుబాబుల గుండెల్లో రైళ్లు పరిగెత్తిస్తోంది.
ఏమిటా కఠిన నిబంధన?
గ్రామాన్ని సంపూర్ణ మద్యపాన రహితంగా మార్చేందుకు గ్రామస్థులంతా ఏకగ్రీవంగా ఒక ప్రతిపాదనను ఆమోదించారు. దీని ప్రకారం:
- రేషన్ కార్డు రద్దు: ఎవరైనా మద్యం తాగి దొరికితే వారి ప్రభుత్వ రేషన్ కార్డును తక్షణమే రద్దు చేస్తారు.
- పథకాలు బంద్: ప్రధానమంత్రి ఆవాస్ యోజన (ఇళ్ల నిర్మాణం), ఉచిత తాగునీటి కనెక్షన్, ఆరోగ్య పథకాలు మరియు పంచాయతీ ద్వారా అందే ఎలాంటి ప్రభుత్వ సాయానికైనా వారు అనర్హులవుతారు.
సమస్యకు పరిష్కారం అన్వేషణ..
డొంగర్‌వాడ గ్రామంలో సుమారు 350 ఇళ్లు, 1500 మంది ఓటర్లు ఉన్నారు. గతంలో ఇక్కడ అక్రమ మద్యం విక్రయాలు జరిగేవి, వాటిని పంచాయతీ అరికట్టింది. అయితే, బయటి నుంచి మద్యం తెచ్చి తాగుతూ ఇంట్లో గొడవలు పడటం, భార్యాపిల్లలను వేధించడం వంటి ఘటనలు ఆగలేదు. దీంతో విసిగిపోయిన యువత, పంచాయతీ సభ్యులు కలిసి ఈ కఠిన నిర్ణయాన్ని తీసుకున్నారు. వ్యసనం వదిలితేనే గ్రామాభివృద్ధి సాధ్యమని వారు బలంగా నమ్ముతున్నారు.
సర్పంచ్ ఏమన్నారంటే?
గ్రామ సర్పంచ్ మాఖన్ మీనా ఈ ఉద్యమానికి నాయకత్వం వహిస్తున్నారు. “మద్యం తాగేవారిని శిక్షించడం కంటే, వారి ప్రభుత్వ సౌకర్యాలను నిలిపివేయడం ద్వారా వారిలో మార్పు వస్తుందని మేము భావిస్తున్నాము. తాగే వ్యక్తిని గుర్తించడానికి ఒక ప్రత్యేక తనిఖీ కమిటీని వేశాము. వీరు ఇచ్చే నివేదిక ఆధారంగా చర్యలు ఉంటాయి” అని ఆయన స్పష్టం చేశారు.
కుటుంబాలపై ప్రభావం.. ఆశయం నెరవేరుతుందా?
ఈ నిబంధన తాగే వ్యక్తికి వర్తిస్తుందని చెబుతున్నా, దాని ప్రభావం కుటుంబంపై కూడా పడుతుంది. అందుకే ఇంట్లోని వారు కూడా తాగే వ్యక్తులను నిరోధిస్తారని, ఇది సామాజిక ఒత్తిడికి దారితీసి వ్యసన విముక్తికి దోహదపడుతుందని గ్రామస్థులు భావిస్తున్నారు. ఈ నిర్ణయం అమలుకు గ్రామమంతా ఏకతాటిపైకి రావడం గమనార్హం. అవసరమైతే గ్రామంలో సీసీటీవీ కెమెరాలను కూడా ఏర్పాటు చేసేందుకు పంచాయతీ సిద్ధమవుతోంది.
మద్యం నిర్మూలన కోసం డొంగర్‌వాడ గ్రామం వేసిన ఈ అడుగు ఇతర గ్రామాలకు ఆదర్శంగా నిలుస్తోంది. ఒకవేళ ఈ ప్రయోగం ఇక్కడ సక్సెస్ అయితే, జిల్లా అంతటా ఇలాంటి నిబంధనలు వచ్చే అవకాశం ఉంది.