ముంబైలోని టాటా మెమోరియల్ సెంటర్ అనుబంధ సంస్థ అయిన ‘అడ్వాన్స్‌డ్ సెంటర్ ఫర్ ట్రీట్‌మెంట్, రీసెర్చ్ అండ్ ఎడ్యుకేషన్ ఇన్ క్యాన్సర్’ (ACTREC) నిర్వహించిన కొత్త పరిశోధన మద్యపాన ప్రియుల నిద్ర చెడగొడుతోంది. మద్యపానంలో ‘సురక్షిత పరిమితి’ (Safe Limit) అంటూ ఏదీ లేదని, అతి తక్కువ పరిమాణంలో మద్యం సేవించినా నోటి క్యాన్సర్ వచ్చే ప్రమాదం ఉందని ఈ అధ్యయనం నిరూపించింది.
పరిశోధనలోని ముఖ్యాంశాలు:
- తక్కువ పరిమాణం కూడా ప్రమాదకరమే: రోజుకు కేవలం ఒక ‘స్టాండర్డ్ డ్రింక్’ సేవించే భారతీయులలో నోటి క్యాన్సర్ (Oral Mucosal Cancer) వచ్చే అవకాశం 50% ఎక్కువగా ఉంటుంది.
- స్థానిక మద్యం అత్యంత ప్రమాదకరం: బీర్, విస్కీ, వైన్ మాత్రమే కాకుండా, భారత్‌లో తయారయ్యే మహువా, తాటి కల్లు (Toddy), నాటు సార వంటి స్థానిక మద్యాలు క్యాన్సర్ ప్రమాదాన్ని రెట్టింపు చేస్తాయి.
- తంబాకు మరియు మద్యం కలయిక: తంబాకు నమిలే అలవాటుతో పాటు మద్యం సేవించే వారికి, ఈ రెండు అలవాట్లు లేని వారితో పోలిస్తే క్యాన్సర్ వచ్చే ప్రమాదం 4 రెట్లు ఎక్కువగా ఉంటుంది.
- క్యాన్సర్ మరణాలు: భారతదేశంలో నోటి క్యాన్సర్ అనేది రెండో అత్యంత సాధారణ క్యాన్సర్. ప్రతి ఏటా సుమారు 1.43 లక్షల కొత్త కేసులు నమోదవుతుండగా, దాదాపు 80,000 మంది దీనివల్ల మరణిస్తున్నారు. ఈ వ్యాధి వచ్చిన వారిలో కేవలం 50% మంది మాత్రమే 5 ఏళ్ల కంటే ఎక్కువ కాలం జీవించగలుగుతున్నారు.
ఏ రాష్ట్రాల్లో ముప్పు ఎక్కువ? అరుణాచల్ ప్రదేశ్, మేఘాలయ, అస్సాం, తెలంగాణ మరియు మధ్యప్రదేశ్ వంటి రాష్ట్రాల్లో మద్యపానం కారణంగా నోటి క్యాన్సర్ వచ్చే కేసులు 15% కంటే ఎక్కువగా ఉన్నాయి. అయితే మద్యపాన నిషేధం ఉన్న గుజరాత్ వంటి రాష్ట్రాల్లో ఈ ప్రమాదం గణనీయంగా తక్కువగా ఉందని పరిశోధన తెలిపింది.
నియంత్రణ పాలసీ అవసరం: ACTREC డైరెక్టర్ డాక్టర్ పంకజ్ చతుర్వేది మాట్లాడుతూ, “భారతదేశంలో మద్యపాన నియంత్రణ విధానాన్ని బలోపేతం చేయడానికి ఇది సరైన సమయం. కొన్ని రకాల స్థానిక మద్యాలలో 90% వరకు ఆల్కహాల్ ఉంటుంది, ఇది ప్రాణాలకు అత్యంత ప్రమాదకరం” అని హెచ్చరించారు.
భారతీయ పురుషులలో బుగ్గ లోపలి భాగం మరియు పెదవుల లోపలి భాగం (Buccal Mucosa) క్యాన్సర్ ఎక్కువగా కనిపిస్తోందని, దీనికి తంబాకు మరియు మద్యమే ప్రధాన కారణమని వైద్యులు స్పష్టం చేశారు.