“మనం చనిపోయినా కలిసే చనిపోదామని మనసులో అనుకుంటూ, నడిఆకాశంలో కిటికీ పగిలి బయటకు లాగబడుతున్న నా భర్త కాళ్లను గట్టిగా పట్టుకున్నాను. ఆ రెండు నిమిషాలు నరకాన్ని కళ్లముందు చూసి వచ్చాము!”
గ్రీస్లోని థెస్సలోనికి నుండి జర్మనీకి బయలుదేరిన రయాన్ఎయిర్ (Ryanair FR1879) బోయింగ్ 737 విమానంలో జూలై 10న నడిఆకాశంలో జరిగిన మరణ భయాన్ని, తృటిలో ప్రాణాపాయం నుండి తప్పించుకున్న 61 ఏళ్ల సెర్బియా దేశస్థుడైన ప్రయాణికుడు లియుబిషా కారోవిచ్ భార్య కన్నీళ్లతో, భావోద్వేగంతో వివరించారు.
విమానం టేకాఫ్ అయిన కొన్ని నిమిషాలకే ఇంజిన్లో ఏర్పడిన సాంకేతిక లోపం కారణంగా ఒక విడిభాగం ఊడిపోయి కిటికీని బలంగా ఢీకొట్టింది. దీంతో క్యాబిన్లో వాయుపీడనం (ఎయిర్ ప్రెజర్) వేగంగా తగ్గిపోయి, ఆక్సిజన్ మాస్కులు స్వయంచాలకంగా కిందకు పడ్డాయి. అదే సమయంలో భయంకరమైన శబ్దం వచ్చింది.
అప్పుడు కిటికీ పక్కన కూర్చున్న కారోవిచ్ శరీర పైభాగం విపరీతమైన గాలి పీడనం వల్ల విమానం వెలుపలికి లాగబడింది. ఆ సమయంలో అతని భార్య మరియు తోటి ప్రయాణికులు రెండు నిమిషాల పాటు మరణ పోరాటం చేసి, అతడిని మళ్లీ లోపలికి లాగి ప్రాణాలు కాపాడారు.
ముఖం, చేతులకు తీవ్ర గాయాలైన కారోవిచ్ ప్రస్తుతం ఆసుపత్రిలో చికిత్స పొందుతున్నారు. పైలట్ల చాకచక్యం వల్ల విమానాన్ని అత్యవసరంగా తిరిగి థెస్సలోనికిలోనే ల్యాండింగ్ చేశారు. మిగిలిన ప్రయాణికులను మరో ప్రత్యామ్నాయ విమానంలో పంపించివేశారు.
నడిఆకాశంలో చోటుచేసుకున్న ఈ అద్భుతమైన ప్రాణాపాయం తప్పిన సంఘటన అంతర్జాతీయంగా తీవ్ర సంచలనం సృష్టించింది. దీనిపై విమానయాన రంగ అధికారులు సమగ్ర విచారణను ప్రారంభించారు.