ప్రతి ఏటా వేల సంఖ్యలో భారతీయులు ఉద్యోగాల కోసం విదేశాలకు వెళ్తుంటారు. ఇటీవల ఇటలీలో ఐటీ నిపుణురాలిగా చేరిన జ్యోతి, తన మొదటి రోజు ఆఫీస్ అనుభవాన్ని ఇన్‌స్టాగ్రామ్‌లో పంచుకున్నారు. అక్కడి పని విధానం చూసి ఆమె విస్మయానికి గురయ్యారు.
ఇటలీ వర్క్ కల్చర్ – ముఖ్యాంశాలు:
- సాయంత్రం 6:01 నిమిషాలకే ఖాళీ: పని వేళలు ముగియగానే, అంటే సాయంత్రం 6:01 కల్లా ఆఫీసు మొత్తం ఖాళీ అయిపోతుందట. పని వేళల తర్వాత సహోద్యోగులకు ఫోన్ చేయడం అక్కడ దాదాపు “నేరం” కింద భావిస్తారని జ్యోతి పేర్కొన్నారు. అది వారి వ్యక్తిగత సమయం (Private Time) అని అందరూ గౌరవిస్తారు.
- బాస్ అని పిలిస్తే నవ్వులే: ఆఫీసులో తన మేనేజర్‌ను జ్యోతి ‘సార్’ అని పిలవగానే అందరూ నవ్వేశారట. అక్కడ ప్రతి ఒక్కరూ సమానమని, పేరు పెట్టి పిలవడమే పద్ధతి అని ఆమెకు వివరించారు.
- కాఫీ బ్రేక్ ముఖ్యం: ఆఫీసులో పనిలో బిజీగా ఉండి ‘బ్రేక్’ తీసుకోనని చెబితే అది పెద్ద తప్పుగా భావిస్తారట. పని మధ్యలో కాఫీ తాగడం, అందరితో ముచ్చటించడం అక్కడ రోజులో అత్యంత ముఖ్యమైన సమయం. అయితే, ఆ సమయంలో పని గురించి మాట్లాడటం నిషిద్ధం!
- తప్పులు చేసినా పర్లేదు: పనిలో ఏదైనా చిన్న తప్పు జరిగితే మన దగ్గర తిట్లు పడతాయేమో కానీ, అక్కడ మాత్రం “తప్పులు సహజం.. వాటి నుండి నేర్చుకో” అని మేనేజర్లు ప్రోత్సహిస్తారట.
- వీకెండ్ ఎంజాయ్‌మెంట్: శని, ఆదివారాలు ఇంట్లో ఖాళీగా కూర్చోవడం అక్కడ నచ్చదు. బయటకు వెళ్లి సరదాగా గడిపి, ఆ ఫోటోలను ఆఫీసులో అందరికీ చూపించాలని సహోద్యోగులు ప్రోత్సహిస్తారట.
మనిషికి మనిషిగా గౌరవం:
ఆఫీసు అంటే కేవలం పని చేసే చోటు మాత్రమే కాదు, మనుషుల మధ్య బంధాలను పెంచే ప్రదేశమని ఇటలీలో భావిస్తారని జ్యోతి చెప్పారు. అక్కడ ఉద్యోగులను కేవలం ‘పనిముట్లు’గా కాకుండా, ‘మనుషులు’గా చూస్తారని ఆమె ప్రశంసించారు. ఇటలీ భాష రాకపోయినా అందరూ తనను ఆత్మీయంగా ఆహ్వానించి మార్గనిర్దేశం చేశారని ఆమె సంతోషం వ్యక్తం చేశారు.