కోల్కతా: పశ్చిమ బెంగాల్ ఎన్నికల్లో 15 ఏళ్ల తర్వాత తృణమూల్ కాంగ్రెస్ అధికారాన్ని కోల్పోయింది. బీజేపీ 206 స్థానాలను కైవసం చేసుకుని తృణమూల్ కాంగ్రెస్ను ఓడించింది. ఇప్పుడు బెంగాల్ తదుపరి ముఖ్యమంత్రి ఎవరనే దానిపై అందరి దృష్టి నెలకొంది. అయితే, ఇదే సమయంలో మమతా బెనర్జీ ముఖ్యమంత్రి పదవికి రాజీనామా చేయడానికి నిరాకరించడం ఒక రాజ్యాంగ సంక్షోభానికి దారితీసింది.
ఓటమి తర్వాత మంగళవారం మమతా బెనర్జీ విలేకరుల సమావేశంలో మాట్లాడారు. “మీరు రాజీనామా చేయడానికి గవర్నర్ వద్దకు వెళ్తారా?” అని ప్రశ్నించగా ఆమె ఇలా స్పందించారు: ‘రాజీనామా చేసే ప్రసక్తే లేదు. నైతికంగా బెంగాల్లో మాదే విజయం. నేను రాజ్భవన్కు వెళ్లి రాజీనామా చేయను. తదుపరి వ్యూహం గురించి పార్టీ నేతలతో చర్చిస్తాను. బీజేపీ అరాచకాలను ఇక సహించను, వీధుల్లోకి వచ్చి పోరాడుతాను. మా పోరాటం బీజేపీతో కాదు, ఎన్నికల సంఘంతో. ఈసీ బీజేపీ కోసం పనిచేసింది.’
మమతా బెనర్జీ తీసుకున్న ఈ నిర్ణయం వల్ల రాజ్యాంగపరమైన ఇబ్బందులు తలెత్తినప్పటికీ, కొత్త ప్రభుత్వం ఏర్పాటుపై దీని ప్రభావం ఉండదని తెలుస్తోంది. ప్రస్తుతం బెంగాల్ గవర్నర్గా ఆర్.ఎన్. రవి ఉన్నారు.
న్యాయ నిపుణుల విశ్లేషణ:
సీనియర్ న్యాయవాది శేఖర్ నాఫ్డే దీనిపై స్పందిస్తూ.. “మమతా బెనర్జీ రాజీనామా చేయడానికి నిరాకరిస్తే, గవర్నర్ ఆమె ప్రభుత్వాన్ని బర్తరఫ్ చేయవచ్చు. ఎందుకంటే ఎన్నికల సంఘం ఇప్పటికే నోటిఫికేషన్ జారీ చేసింది” అని తెలిపారు.
“అసెంబ్లీ 5 ఏళ్ల పదవీకాలం ముగిసిన తర్వాత గవర్నర్ అసెంబ్లీని రద్దు చేయవచ్చు. బెంగాల్ ప్రస్తుత అసెంబ్లీ పదవీకాలం మే 7, 2026న ముగుస్తుంది. మమతా బెనర్జీ రాజీనామా సమర్పించకపోయినా పెద్దగా మారేదేమీ లేదు. ప్రజా తీర్పు వెలువడింది కాబట్టి గవర్నర్ నేరుగా ప్రభుత్వాన్ని బర్తరఫ్ చేయవచ్చు” అని ఆయన స్పష్టం చేశారు.
రాజ్యాంగ నిపుణుల అభిప్రాయం ప్రకారం, మమతా బెనర్జీ రాజీనామా చేయకపోయినా కొత్త అసెంబ్లీ ఏర్పాటు మరియు కొత్త ముఖ్యమంత్రి ప్రమాణ స్వీకార కార్యక్రమాలపై ఎలాంటి ప్రభావం ఉండదు. ప్రస్తుత ముఖ్యమంత్రి రాజీనామా లేకపోయినా గవర్నర్ కొత్త ప్రభుత్వాన్ని నియమించవచ్చు. ఎన్నికల సంఘం ఎవరికైతే విజయ ధృవీకరణ పత్రాలు అందజేసిందో, వారినే చట్టబద్ధమైన ప్రతినిధులుగా పరిగణిస్తారు.