మహారాష్ట్రలో గత కొన్ని నెలలుగా మహిళలపై జరుగుతున్న అకృత్యాల ఘటనలు కలకలం సృష్టిస్తున్నాయి. నాసిక్లోని ఐటీ కంపెనీ వేధింపుల ఘటన మరవకముందే, జలగావ్ జిల్లా బాంభోరీలోని ఆస్టోమో కంపెనీలో ఒక సీనియర్ అధికారి మహిళా ఉద్యోగినిని లైంగికంగా వేధిస్తూ వినయభంగం చేసిన ఘటన వెలుగులోకి వచ్చింది. బాధితురాలి ఫిర్యాదు మేరకు జనార్దన్ అనే సీనియర్ అధికారిపై ధరణ్గావ్ పోలీస్ స్టేషన్లో కేసు నమోదైంది.
ఘటన వివరాలు: బాధితురాలు తన అనారోగ్యంతో ఉన్న కుమార్తెను చూసుకోవడానికి సెలవు కోరగా, సదరు అధికారి ఆమె పట్ల అసభ్యంగా ప్రవర్తించాడు. “నువ్వు చాలా అందంగా ఉన్నావు, నాకు నువ్వు నచ్చావు. నన్ను సంతోషపెట్టు, నీకు రెండు రోజులు కాదు కదా.. పది రోజులు సెలవు ఇస్తాను, జీతం కూడా కట్ చేయను” అని వేధించినట్లు ఫిర్యాదులో పేర్కొన్నారు.
బాధితురాలు దీనిని ప్రతిఘటించగా, నిందితుడు ఆమెను చెంపదెబ్బ కొట్టి కింద పడేసి అసభ్య చేష్టలకు పాల్పడ్డాడు. “నాకు పెద్దపెద్ద గూండాలు, రాజకీయ నాయకులతో సంబంధాలు ఉన్నాయి. ఈ విషయం ఎవరికైనా చెబితే నిన్ను, నీ కుటుంబాన్ని అంతం చేస్తాను” అని బెదిరించాడు.
కొత్త అమ్మాయిలను ట్రాప్ చేయాలని ఒత్తిడి: నిందితుడు అక్కడితో ఆగకుండా.. ఈ ఘటనకు సంబంధించిన అభ్యంతరకర వీడియోను సోషల్ మీడియాలో వైరల్ చేస్తానని భయపెట్టాడు. కంపెనీలోకి కొత్తగా వచ్చే అమ్మాయిలను కూడా తన వద్దకు తీసుకురావాలని, అలా చేస్తేనే ఆమెకు ఎలాంటి ఇబ్బందులు కలగకుండా చూస్తానని ఒత్తిడి తెచ్చాడు. గత ఏడు నెలలుగా ఈ నరకాన్ని అనుభవించిన బాధితురాలు, ఎట్టకేలకు ధైర్యం తెచ్చుకుని తన కుటుంబంతో కలిసి పోలీసులను ఆశ్రయించింది. ప్రస్తుతం నిందితుడు పరారీలో ఉన్నాడని, అతని కోసం గాలిస్తున్నామని పోలీసులు తెలిపారు.
మీరా రోడ్ ఘటనపై ఎమ్మెల్యే గోపీచంద్ పడల్కర్ ఆగ్రహం: మీరా రోడ్లో ఒక యువకుడిపై కత్తితో దాడి చేసిన ఘటనను ఎమ్మెల్యే గోపీచంద్ పడల్కర్ తీవ్రంగా ఖండించారు. మతాన్ని అడిగి మరి దాడి చేయడం హేయమైన చర్య అని, రాష్ట్ర హోం మంత్రి దేవేంద్ర ఫడ్నవీస్ దీనిపై కఠిన చర్యలు తీసుకుంటారని ఆయన ఆశాభావం వ్యక్తం చేశారు. మహారాష్ట్రలో ఇలాంటి “జిహాద్” ఘటనలు పెరిగిపోతున్నాయని ఆయన ఆందోళన వ్యక్తం చేశారు.