అమెరికాలో ఒక మహిళ ఇంట్లోకి అక్రమంగా చొరబడి, ఆమె నిద్రిస్తున్న సమయంలో ఆమె కాలి వేళ్లను నోటితో పీల్చుతూ వేధించిన వ్యక్తికి ఆరేళ్ల ఎనిమిది నెలల జైలు శిక్ష పడింది.
కాలిఫోర్నియాలోని మోడెస్టోకు చెందిన 28 ఏళ్ల క్రిస్టియన్ సోలోరియో అనే వ్యక్తిపై స్టాకింగ్ (వేధించడం) మరియు లైంగిక దాడి చేసే ఉద్దేశంతో నివాసంలోకి చొరబడినట్లు నిర్ధారణ అయిందని స్టానిస్లాస్ కౌంటీ డిస్ట్రిక్ట్ అటార్నీ కార్యాలయం తెలిపింది. కాలిఫోర్నియా చట్టం ప్రకారం అతనికి గరిష్టంగా 6 ఏళ్ల 8 నెలల శిక్ష విధించారు.
ఏం జరిగింది?
గతేడాది ఫిబ్రవరిలో సోలోరియో బాధితురాలిని ఆమె పని ప్రదేశంలో మొదటిసారి చూశాడు. అప్పటి నుండి ఆమెపై పిచ్చి పెంచుకున్న అతడు, రోజుకు పలుమార్లు ఆమె ఆఫీసు వద్దకు వెళ్లడం, బయట తిరుగుతూ ఆమెను కలవడానికి ప్రయత్నించేవాడు.
బాధితురాలిని తనతో డేటింగ్‌కు రావాలని పలుమార్లు అడగడమే కాకుండా, ఆమెను మెక్సికో తీసుకువెళ్తానని ఒక లేఖ కూడా రాశాడు. ఈ వేధింపులు కొన్ని వారాల పాటు కొనసాగాయి.
మే 21, 2025 రాత్రి, బాధితురాలి తండ్రి ఇంట్లో లేని సమయం చూసి సోలోరియో ఆమె ఇంట్లోకి చొరబడ్డాడు. ఆ మహిళ నిద్ర నుండి లేచి చూసేసరికి, సోలోరియో తన బెడ్‌రూమ్‌లో ఉండి తన కాలి వేళ్లను నోటితో పీల్చుకోవడం చూసి షాక్‌కు గురైంది.
అరెస్ట్ మరియు విచారణ
ఆ సమయంలో భయపడినప్పటికీ, పరిస్థితిని అదుపు చేయడానికి బాధితురాలు అతనితో స్నేహపూర్వకంగా మాట్లాడి శాంతింపజేయడానికి ప్రయత్నించింది. ఆ తర్వాత ఇతర కుటుంబ సభ్యులు గదిలోకి వచ్చి సోలోరియోను బయటకు వెళ్ళమని డిమాండ్ చేశారు.
బాధితురాలు 911కి కాల్ చేయడంతో పోలీసులు విచారణ చేపట్టి అతడిని అదుపులోకి తీసుకున్నారు. బాధితురాలిని కలవడానికే తాను ఇంట్లోకి చొరబడినట్లు సోలోరియో అంగీకరించాడు. ఈ కేసుతో పాటు సోలోరియోపై డ్రగ్స్ స్మగ్లింగ్‌కు సంబంధించిన ఇతర ఫెడరల్ కేసులు కూడా ఉన్నట్లు అధికారులు తెలిపారు.