సీయాటిల్: ప్రపంచవ్యాప్తంగా ఆర్టిఫిషియల్ ఇంటెలిజెన్స్ (AI) పై పరిశోధనలు శరవేగంగా సాగుతున్న తరుణంలో, ప్రముఖ పారిశ్రామికవేత్త ఎలాన్ మస్క్ చేసిన తాజా వ్యాఖ్యలు ప్రపంచాన్ని విస్మయానికి గురిచేస్తున్నాయి. రాబోయే నాలుగు లేదా ఐదేళ్లలో, ప్రపంచంలోని మానవులందరి ఉమ్మడి మేధస్సు (Collective Intelligence) కంటే ఏఐ అత్యంత తెలివైనదిగా మారిపోతుందని ఆయన అంచనా వేశారు.
నేటి సాంకేతిక ప్రపంచంలో కృత్రిమ మేధ (AI) సాంకేతికత ప్రతిరోజూ కొత్త శిఖరాలను తాకుతోంది. మనం ఊహించలేనంత వేగంతో ఈ రంగంలో పరిశోధనలు జరుగుతున్నాయి. ఈ నేపథ్యంలోనే, మరో 4 ఏళ్లలోనే ఏఐ మానవాళి మొత్తం జ్ఞానాన్ని మించిపోతుందని మస్క్ పేర్కొన్నారు.
ఏఐ సాంకేతికతపై ఎక్స్ (X) వేదికగా చర్చ:
ప్రముఖ పారిశ్రామికవేత్త పీటర్ హెచ్. డయామండిస్ తన ఎక్స్ (గతంలో ట్విట్టర్) ఖాతాలో చేసిన ఒక పోస్ట్కు సమాధానమిస్తూ ఎలాన్ మస్క్ ఈ వ్యాఖ్యలు చేశారు. “మానవాళి యొక్క భవిష్యత్తు అభివృద్ధి అనేది కేవలం కంప్యూటర్ల సామర్థ్యం, శక్తి పెరగడం వల్ల మాత్రమే రాదు.. దానికి బదులుగా మానవులు కొత్త ఆవిష్కరణలను సృష్టించడానికి, సంక్లిష్ట సమస్యలను పరిష్కరించడానికి అవసరమైన అత్యాధునిక సాధనాలను (Tools) పొందడం ద్వారానే సాధ్యమవుతుంది” అని డయామండిస్ పేర్కొన్నారు. అంటే మానవుడి భవిష్యత్తు వారు ఉపయోగించే సాధనాలపై ఆధారపడి ఉంటుందని ఆయన అభిప్రాయపడ్డారు.
దీనికి సమాధానమిచ్చిన ఎలాన్ మస్క్.. మానవ సామర్థ్యం కంటే ఏఐ వృద్ధి రేటు అత్యంత వేగంగా ఉందని గుర్తుచేశారు. రాబోయే కొద్ది సంవత్సరాలలోనే ఏఐ సాంకేతికత మొత్తం మానవజాతి ఉమ్మడి మేధో సామర్థ్యాన్ని అధిగమిస్తుందని మస్క్ గట్టిగా విశ్వసిస్తున్నారు. కాగా, మస్క్ ఇలాంటి ఒక కాలపరిమితిని (Timeline) ప్రకటించడం ఇది మొదటిసారి ఏమీ కాదు.
ఎలాన్ మస్క్ ఖచ్చితమైన అంచనాలు:
ఏఐ భవిష్యత్తు ఎలా ఉండబోతుందనే దానిపై ఎలాన్ మస్క్ కొన్ని స్పష్టమైన మైలురాళ్లను అంచనా వేశారు:
ఈ ఏడాదిలోనే (2026): మానవుడిలాగే స్వయంగా ఆలోచించగల ‘ఏజీఐ’ (AGI – Artificial General Intelligence) రూపుదిద్దుకుంటుందని ఆయన భావిస్తున్నారు.
2027 నాటికి: ఒక సాధారణ వ్యక్తి కంటే ఏఐ అత్యంత తెలివైనదిగా మారుతుంది.
2030 – 2031 నాటికి: ప్రపంచంలోని మనుషులందరి తెలివితేటలను ఒకచోట చేరిస్తే ఎంత అవుతుందో.. అంతకంటే ఎక్కువ శక్తివంతంగా ఏఐ మారుతుందని ఆయన ‘ప్రపంచ ఆర్థిక వేదిక’ (WEF) సమావేశంలో తెలిపారు. దీనిని ఆయన ‘ఆర్టిఫిషియల్ సూపర్ ఇంటెలిజెన్స్’ (ASI) అని పిలుస్తున్నారు.
ప్రస్తుతం ఓపెన్ ఏఐ (OpenAI), గూగుల్ (Google), మెటా (Meta), ఆంత్రోపిక్ (Anthropic) మరియు ఎలాన్ మస్క్కు చెందిన ఎక్స్ఏఐ (xAI) వంటి దిగ్గజ సంస్థలు అత్యంత ప్రతిష్టాత్మకంగా ఏఐ మోడల్స్ను అభివృద్ధి చేస్తున్నాయి. ఈ వ్యవస్థలు ఇప్పటికే కంప్యూటర్ కోడింగ్ రాయడం, వ్యాసాలు సృష్టించడం, పరిశోధనలు చేయడం వంటి సంక్లిష్టమైన పనులను విజయవంతంగా చేస్తున్నాయి. దీనికోసం బిలియన్ల కొద్దీ డాలర్లను ఖర్చు చేస్తూ, భారీ డేటా సెంటర్లు, ఏఐ చిప్లను తయారు చేస్తున్నారు. అనేక దేశాల అధినేతలు భావిస్తున్న దానికంటే సాంకేతిక విప్లవం చాలా వేగంగా జరుగుతోందని మస్క్ హెచ్చరిస్తున్నారు.
యంత్రాలే అన్నీ చేస్తాయి:
ఎలాన్ మస్క్ అభిప్రాయం ప్రకారం.. ఈ సాంకేతిక విప్లవం మానవ జీవితంలో విప్లవాత్మక మార్పులను తీసుకురానుంది. ముఖ్యంగా ఉత్పత్తి (మాన్యుఫ్యాక్చరింగ్), రవాణా, నిర్మాణం (కన్స్ట్రక్షన్) మరియు కఠినమైన శారీరక శ్రమతో కూడిన పనులను భవిష్యత్తులో ఏఐ ఆధారిత యంత్రాలే చూసుకుంటాయి. మనుషులు చేసే కష్టమైన పనులను యంత్రాలు భర్తీ చేసినప్పుడు, వస్తువుల ఉత్పత్తి వ్యయం (Production Cost) గణనీయంగా తగ్గుతుంది. దీనివల్ల ప్రపంచ ప్రజలందరికీ అవసరమైన వస్తువులు, సేవలు అత్యంత చౌకగా, సమృద్ధిగా లభించే సరికొత్త వాతావరణం ఏర్పడుతుంది.
ఆప్టిమస్ (Optimus):
టెస్లా (Tesla) సంస్థ తయారుచేస్తున్న ‘ఆప్టిమస్’ హ్యూమనాయిడ్ (మానవ రూప) రోబోలు ఈ మార్పులో కీలక పాత్ర పోషిస్తాయని మస్క్ నమ్ముతున్నారు. టెస్లా భవిష్యత్తుకు ఎలక్ట్రిక్ కార్లను తయారు చేయడం కంటే.. ఈ రోబోలను అభివృద్ధి చేయడమే అత్యంత కీలకమని ఆయన స్పష్టం చేశారు. ఫ్యాక్టరీల నుండి ఇళ్ల వరకు ప్రమాదకరమైన, విసుగు పుట్టించే పనులన్నింటినీ ఈ రోబోలే పూర్తి చేస్తాయి. ఈ ఏఐ సాంకేతికత మానవాళికి కావలసిన అన్ని సదుపాయాలను పుష్కలంగా అందిస్తూ, ఒక సరికొత్త స్వర్ణ యుగాన్ని సృష్టిస్తుందనేదే మస్క్ యొక్క సుదూర విజన్