బెర్లిన్ అంతర్జాతీయ మారథాన్ పోటీలో, చైనాకు చెందిన ఒక ప్రముఖ ఫిట్‌నెస్ ఇన్‌ఫ్లుయెన్సర్ పరుగెత్తకుండా సైకిల్‌పై వెళ్లి మోసం చేసిన వ్యవహారం వెలుగులోకి వచ్చి తీవ్ర సంచలనం సృష్టించింది.
చైనా సామాజిక మాధ్యమాల్లో ఐదు లక్షలకు పైగా ఫాలోవర్లను కలిగి ఉన్న ‘అబీర్’ (Abeeeer) అనే ఆ యువతి.. సెప్టెంబర్ 27న జరిగిన బెర్లిన్ మారథాన్‌ను 4 గంటల 53 నిమిషాల్లో పరుగెత్తి పూర్తి చేసి, తన జీవితకాలపు అత్యుత్తమ రికార్డును నమోదు చేసినట్లు ఇంటర్నెట్‌లో పోస్ట్ చేసింది.
కానీ, పోటీ చివరి దశలో 35 నుంచి 40 కిలోమీటర్ల దూరం మధ్యలో ఆమె ఒక సైకిల్ వెనుక కూర్చుని ప్రయాణించడాన్ని తోటి రన్నర్ ఒకరు ఫోటో తీసి మారథాన్ నిర్వాహకులకు ఆధారాలతో సహా ఫిర్యాదు చేశాడు.
ఈ వ్యవహారం వివాదాస్పదం కావడంతో, తన తప్పును అంగీకరించి క్షమాపణలు కోరిన ఆ యువతి.. పరుగెత్తుతున్నప్పుడు తనకు అనారోగ్యంగా అనిపించడంతో సైకిల్‌పై వెళ్లానని, తాను చేసింది చాలా పెద్ద మోసమని బహిరంగంగా అంగీకరించింది.
ఈ ఘటన తర్వాత, ఆమెతో ఒప్పందం కుదుర్చుకున్న ప్రముఖ క్రీడా దుస్తుల సంస్థ ‘బ్రూక్స్ చైనా’ (Brooks China) తమ స్పాన్సర్‌షిప్‌ను తక్షణమే రద్దు చేయడమే కాకుండా, ఇకపై ఇలాంటి ఇన్‌ఫ్లుయెన్సర్లను ఎంచుకునేటప్పుడు కఠినంగా పరిశీలిస్తామని ప్రకటించింది.