న్యూఢిల్లీ: సోషల్ మీడియాలో ఇండియా గురించి తరచుగా వచ్చే ప్రతికూల చిత్రణను సవాలు చేస్తూ ఒక బ్రిటిష్ ట్రావెల్ వ్లాగర్ షేర్ చేసిన వీడియో ప్రస్తుతం వైరల్ అవుతోంది.
ప్రస్తుతం భారతదేశంలో పర్యటిస్తున్న జాక్ హీటన్, సోషల్ మీడియాలో తాను చూసిన కథనాలకు, వాస్తవానికి ఎక్కడా పోలిక లేదని ఇన్స్టాగ్రామ్ వీడియోలో వివరించారు. ఆ వీడియో ప్రారంభంలో ఆయన మాట్లాడుతూ.. “నిజాయితీగా చెబుతున్నాను ఫ్రెండ్స్, నేను ఏం తప్పు చేస్తున్నానో నాకు తెలియదు కానీ, మీరు ఆన్లైన్లో చూసే ఇండియా నాకు ఎక్కడా కనిపించడం లేదు” అని వ్యాఖ్యానించారు.
ఏం జరిగింది?
జాక్ హీటన్ పర్యటనలో అనుకోకుండా కిందపడి తన కాలికి తీవ్రంగా గాయమైంది. “ఒక తెలివితక్కువ వాడిలా నేను కిందపడి నా కాలిని పగలగొట్టుకున్నాను” అని ఆయన చెప్పుకొచ్చారు. అయితే ఆ తర్వాత జరిగిన పరిణామం ఆయనను ఆశ్చర్యపరిచింది. ఇద్దరు స్థానిక వ్యక్తులు వెంటనే స్పందించి, ఆయనను తమ ఇంటికి తీసుకెళ్లి, గాయాన్ని శుభ్రం చేసి కట్టు కట్టారు. ఇదంతా వారు ఎలాంటి ప్రతిఫలం ఆశించకుండా కేవలం మానవత్వంతో చేశారు.
అంతేకాకుండా, తన పర్యటన ఆరంభంలో జరిగిన మరో ఘటనను కూడా ఆయన గుర్తు చేసుకున్నారు. ఒక రెస్టారెంట్కు వెళ్లినప్పుడు మెనూ చూసి ఏమీ అర్థం కాక అయోమయంలో ఉన్న తనను చూసి, అక్కడ పని చేసే వ్యక్తి కాకపోయినప్పటికీ ఒక మహిళ స్వచ్ఛందంగా ముందుకు వచ్చి, వంటకాల గురించి వివరించి ఏది బాగుంటుందో సూచించారని తెలిపారు.
ఆన్లైన్ స్టీరియోటైప్స్పై ప్రశ్నలు
ఆన్లైన్ ప్రచారాలకు, వాస్తవానికి ఉన్న వ్యత్యాసంపై స్పందిస్తూ.. “ఎక్కడున్నాయి ఈ మోసాలు (Scams)? ఎక్కడుంది ఆ వాసన? లేక ఆన్లైన్లో మనకు కేవలం ఒక వైపు మాత్రమే చూపిస్తున్నారా?” అని ఆయన ప్రశ్నించారు.
ఆయన తన పోస్ట్లో ఇలా రాశారు: “ఏ ప్రదేశమూ పరిపూర్ణం కాదు, కానీ ఇండియా అనేది కేవలం ఒక వైపు మాత్రమే చూపించే చిత్రణ కంటే చాలా భిన్నమైనది మరియు లోతైనది. నా ప్రయాణంలో నాకు 99% మంది జిజ్ఞాస కలిగిన, దయగల వ్యక్తులే కనిపించారు. వారు ఎప్పుడూ మీ క్షేమాన్ని కోరుకుంటారు.” అద్భుతమైన ఆహారం, ప్రకృతి దృశ్యాలతో నిండిన ఈ దేశాన్ని ఇతరుల అభిప్రాయాలతో కాకుండా స్వయంగా వచ్చి చూడాలని ఆయన కోరారు.