ప్రస్తుతం కాలుష్యం పెరుగుతున్న నేపథ్యంలో ఊపిరితిత్తులు బలహీనపడటం వల్ల శ్వాస తీసుకోవడంలో ఇబ్బంది, దగ్గు, గుండెలో నొప్పి వంటి సమస్యలతో చాలా మంది బాధపడుతున్నారు. ఊపిరితిత్తుల ఆరోగ్యాన్ని సహజ సిద్ధంగా మెరుగుపరుచుకోవడానికి అమెరికన్ అనస్థీషియాలజిస్ట్ డాక్టర్ కునాల్ సూద్ మూడు ముఖ్యమైన అలవాట్లను సూచించారు.
ఊపిరితిత్తులు దెబ్బతినడానికి కారణాలు:
అలవాట్లను తెలుసుకునే ముందు, మన ఊపిరితిత్తులకు హాని చేసే అంశాలను డాక్టర్ సూద్ వివరించారు:
- ధూమపానం: ఇది కేన్సర్ ముప్పును పెంచడమే కాకుండా ఊపిరితిత్తులను వేగంగా బలహీనపరుస్తుంది.
- ఇంటి లోపలి కాలుష్యం: ఒక్కోసారి బయటి గాలి కంటే ఇంట్లోని గాలి (అగరుబత్తులు, ఎయిర్ ఫ్రెషనర్లు, ఫర్నిచర్ నుండి వచ్చే కణాలు) ఊపిరితిత్తులకు ఎక్కువ హాని చేస్తుంది.
- వ్యాయామం లేకపోవడం: శారీరక శ్రమ తక్కువగా ఉండటం వల్ల ఊపిరితిత్తుల సామర్థ్యం తగ్గిపోతుంది.
ఊపిరితిత్తులను బలోపేతం చేసే 3 అలవాట్లు:
1. ప్రతిరోజూ కార్డియో వ్యాయామం: రోజుకు కనీసం 20 నుండి 30 నిమిషాల పాటు రన్నింగ్, జాగింగ్, నడక లేదా సైక్లింగ్ వంటి కార్డియో వ్యాయామాలు చేయాలి. దీనివల్ల రక్త ప్రసరణ మెరుగుపడి, శ్వాసనాళాలు శుభ్రపడతాయి.
2. స్లో నాసల్ ట్రైనింగ్ (Slow Nasal Training): ప్రతిరోజూ ఉదయం 15 నిమిషాల పాటు లోతైన శ్వాస ప్రక్రియను ప్రాక్టీస్ చేయాలి. గాలిని పీల్చుకున్న తర్వాత 5 సెకన్ల పాటు ఆపి, నెమ్మదిగా వదలాలి. ఇది మానసిక ఒత్తిడిని తగ్గించడమే కాకుండా గుండె, ఊపిరితిత్తుల పనితీరును మెరుగుపరుస్తుంది.
3. పేగు ఆరోగ్యం (Healthy Gut): ఆశ్చర్యకరంగా, మన పేగుల్లో ఉండే మంచి బ్యాక్టీరియా ఊపిరితిత్తుల ఆరోగ్యంతో సంబంధం కలిగి ఉంటుంది. పేగులు ఆరోగ్యంగా ఉంటే ఊపిరితిత్తుల్లో వాపు (Inflammation) తగ్గుతుంది. అందుకే ప్రొబయోటిక్ ఆహారాలను డైట్‌లో చేర్చుకోవాలని డాక్టర్ సూచించారు.