‘మీ పాలసీ తప్పుదోవ పట్టించేలా ఉంది, మాకే అర్థం కాకపోతే బీహార్ సామాన్యుడికి ఏం అర్థమవుతుంది…’ వాట్సాప్‌పై సుప్రీంకోర్టు ఆగ్రహం

సోషల్ మీడియా ప్లాట్‌ఫారమ్ వాట్సాప్ మరియు దాని మాతృ సంస్థ మెటా (Meta) పై సుప్రీంకోర్టు తీవ్ర ఆగ్రహం వ్యక్తం చేసింది. వాట్సాప్ యొక్క 2021 ప్రైవేసీ పాలసీపై మంగళవారం విచారణ జరిగింది. విచారణ ప్రారంభంలో కేంద్ర ప్రభుత్వం తరపున సాలిసిటర్ జనరల్ తుషార్ మెహతా వాదిస్తూ.. వాట్సాప్ ప్రైవేసీ పాలసీ ‘దోపిడీ’ పూరితంగా ఉందని, ఇది వినియోగదారుల డేటాను పంచుకోవడమే కాకుండా వాణిజ్య ప్రయోజనాల కోసం వాడుకుంటోందని పేర్కొన్నారు.

దీనిపై ముఖ్య న్యాయమూర్తి (CJI) సూర్యకాంత్ కఠిన పదజాలంతో స్పందిస్తూ, “మీరు మా రాజ్యాంగాన్ని గౌరవించలేకపోతే, భారతదేశం విడిచి వెళ్ళిపోండి. ఏ ఒక్క పౌరుడి వ్యక్తిగత గోప్యత విషయంలోనూ మేము రాజీ పడము” అని హెచ్చరించారు.

మీ పాలసీ తప్పుదోవ పట్టిస్తోంది – CJI వాట్సాప్ ప్రైవేసీ పాలసీ డాక్యుమెంట్‌ను చాలా తెలివిగా (మోసపూరితంగా) రూపొందించారని CJI అభిప్రాయపడ్డారు. “మీ పాలసీ ఎంత క్లిష్టంగా ఉందంటే.. ఒక పేద వృద్ధురాలు, వీధి వ్యాపారి లేదా కేవలం తమిళం మాత్రమే మాట్లాడే మహిళా- మీ ఉద్దేశాన్ని అర్థం చేసుకోగలరా?” అని ప్రశ్నించారు.

బీహార్ వ్యక్తికి ఏం అర్థమవుతుంది? CJI ఇంకా మాట్లాడుతూ.. “మీరు ఇక్కడ సేవలు అందించడానికి ఉన్నారు తప్ప, డేటాను సేకరించి ఇతరులకు షేర్ చేయడానికి కాదు. కొన్నిసార్లు మీ పాలసీని అర్థం చేసుకోవడంలో మాకే ఇబ్బంది కలుగుతోంది- అటువంటప్పుడు బీహార్‌లోని మారుమూల గ్రామీణ ప్రాంతాల్లో ఉండే సామాన్యులకు ఏం అర్థమవుతుంది?” అని ప్రశ్నించారు. వినియోగదారుల సమ్మతి (Informed Consent) లేకుండా డేటాను వాడుకోవడాన్ని అంగీకరించబోమని స్పష్టం చేశారు.

డేటా-ప్రకటనలపై ఆందోళన: CJI సూర్యకాంత్ ఒక వ్యక్తిగత ఉదాహరణ ఇస్తూ.. “ఒక డాక్టర్ వాట్సాప్‌లో మూడు మందుల పేర్లు పంపిస్తే, ఐదు నిమిషాల లోపే అదే మందులకు సంబంధించిన ప్రకటనలు ఫోన్‌లో వెల్లువెత్తుతున్నాయి” అని ఆందోళన వ్యక్తం చేశారు. జస్టిస్ జోయ్మల్య బాగ్చీ కూడా స్పందిస్తూ.. కంపెనీలు ప్రజల డిజిటల్ ఫుట్‌ప్రింట్‌ను ప్రకటనల కోసం వాడుకుంటున్నాయని, ఇలాంటి కంపెనీలపై నిశిత నిఘా అవసరమని పేర్కొన్నారు.

జరిమానా మరియు చట్టపరమైన పోరాటం: నవంబర్ 2024లో కాంపిటీషన్ కమిషన్ ఆఫ్ ఇండియా (CCI) వాట్సాప్‌పై ₹213 కోట్ల జరిమానా విధించింది. తమ ప్లాట్‌ఫారమ్ అధికారాన్ని వాడుకుని వినియోగదారులను కొత్త పాలసీ అంగీకరించాలని బలవంతం చేసినందుకు ఈ చర్య తీసుకుంది. దీనిపై మెటా సంస్థ సుప్రీంకోర్టును ఆశ్రయించగా, కోర్టు అన్ని పక్షాలకు నోటీసులు జారీ చేస్తూ తదుపరి విచారణను ఫిబ్రవరి 9కి వాయిదా వేసింది.